立場新聞 Stand News

【47 人案】還押近況更新 眾被告囚車上感動落淚、精神不俗 岑敖暉夫妻隔玻璃畫心

2021/3/6 — 23:39

47 名參與或組織初選的民主派人士被落案起訴「串謀顛覆國家政權」,15 人獲准保釋,但律政司即時覆核令眾人需繼續還柙,其中 4 人覆核獲撤,暫獲自由,其餘 43 人目前已被送至不同懲教所及收押所,其專頁小編及家屬紛紛更新當中部分人的近況。

其中民陣召集人陳皓桓指,已同時見到岑子杰、梁國雄、楊岳橋、梁晃維四人。他指梁國雄向他打招呼,並比手勢叫「頂住」;楊岳橋向他大大力揮手;梁晃維則比了個心心手勢;岑子杰則向陳皓桓指,一眾被告在囚車聽到好多人叫他們堅持及加油,令眾人全部都在囚車感動至落淚。

岑敖暉妻子余思朗指,岑精神不錯,只是因幾日沒剃鬚,令他的鬚很長。余思朗指岑敖暉很想知過去幾日審訊的事,並大叫「好撚悶啊!!!!!」兩人有講有笑,並用消毒紙巾在玻璃上互畫心心。

廣告

11 人今日(6 日)接受高等法院原訟法庭保釋覆核的「指示聆訊」。高院國安法指定法官杜麗冰宣布押後覆核聆訊至下週四(11 日)及週六(13 日),又拒絕批出臨時保釋,11 人要繼續還押。

各人近況更新節錄如下:

廣告

袁嘉蔚小編:嘉蔚經歷漫長四日的審訊,未能成功保釋,現還柙於羅湖懲教所。這兩天親友探望過她,精神尚好。但嘉蔚仍然需要各位朋友的文字支持,現在邀請各位成為寫信師,以文字為嘉蔚打打氣、解解悶啊

徐子見小編:今早子見的親人去了荔枝角收押所探訪,子見精神狀態尚可。目前子見如同其他46人被單獨囚禁,希望各位朋友可以的話請寫信給子見解悶。

陳皓桓:今日終於探到岑子杰,仲順便見到梁國雄、楊岳橋、梁晃維,長毛打招呼同比左手勢叫頂住,Alvin大大力揮手,Fergus比左個心心我(即刻送番個心佢)至於岑子杰,佢同我講上左囚車之後,一眾被告係囚車聽到好多人叫佢哋堅持同加油,佢哋全部都係囚車到感動到流眼淚。至於佢哋狀況上,慢慢適應緊,但精神都ok幾好。同埋,我問佢有無野同我講,佢話叫我唔好咁快中國安法入去坐 。

譚得志小編:今日都係家人探訪,快必話睇報紙先至知慢必都轉咗會去赤柱,家人話俾佢知赤柱好似比較企理乾淨,佢眼睛瞳孔放大,叮一聲咁,好似有啲心動,轉頭就話: 唉,遲早要轉會㗎啦,荔枝角都好好吖;佢無奈咁講每日嘅起居作息,仍然未掌握到。

黃子悅小編:現身處羅湖懲教所。今日她的親人和友人一同前往羅湖探望她。監獄的生活不易適應,與親人別離亦使她難受。

尹兆堅小編:連日嚟嘅審訊,都見到市民送車,由西九返收押所,沿路都見到燈光, 一閃而過既燈光, 未幾又見到大家一路跑, 見到沿途有大家,你地既支持,我聽到、收到、感受到!我好感動!

吳敏兒小編:Carol第一件事就話好掛念大家,並抱歉依家唔能夠同大家一齊並肩作戰。Carol腰骨痛舊患發作,晚上都睡不好,食咗止痛藥都繼續作痛。

何桂藍小編:現身處大欖懲教所,已有親友成功探訪並送達物資。她早已預料自己不能獲得保釋,經歷一晚休息過後,狀態尚算不俗。她感謝過往一個星期許多到庭旁聽的朋友,尤其是夜深仍然堅持送車的手足,表示自己能夠清楚看見他們的聲援,亦希望大家在繼續關注初選案的同時,也能夠關心其他案件的手足。

劉穎匡女友:今早探完劉頴匡,佢精神好咗好多,由尋日哭L左(哭L埋右),變到今日識得搞笑。佢地宜家仲係單獨囚禁,不過有一個小時放風,可以見到其他人。范國威帶熱身、李予信教佢地跳街舞,佢仲跑咗「人生未試過咁多個圈」。

陳志全小編:慢必見到佢哋兩個(好友及教練),當然好開心啦,赤柱嘅玻璃好乾淨,所以見個樣見得好清楚,慢必話佢自己嘅私家房,都幾企理;慢必話喺入面想唱歌,叫C君幫佢準備一啲歌詞俾佢,大家有冇乜嘢好提議?

譚得志小編:今日都係家人探訪,快必話睇報紙先至知慢必都轉咗會去赤柱,家人話俾佢知赤柱好似比較企理乾淨,佢眼睛瞳孔放大,叮一聲咁,好似有啲心動,轉頭就話: 唉,遲早要轉會㗎啦,荔枝角都好好吖;佢無奈咁講每日嘅起居作息,仍然未掌握到。

林卓廷小編:根據廷媽,阿廷今日精神不俗,而阿廷都話自己食得訓得,令廷媽放心左好多。阿廷話因單獨囚禁,每日兩節各一小時嘅運動時間都係得佢自己一個渡過,食飯都係自己一個食。佢話覺得孤單嘅時候就會自己唱下《奇異恩典》振奮下自己,所以大家唔洗擔心佢。佢又話夜晚隱若聽到出面嘅打氣聲,佢衷心感激各方好友持續支持着佢哋。

梁國雄小編:毛嫂今天第一次探望到長毛。長毛精神頗佳,他本人卻抱怨因為日日上庭,坐到腰酸背痛。談及人大將改變香港選舉制度,長毛嘆到:《基本法》話「循步漸進」,現在已變為「無序盡退」。面對前所未有的轉變,希望香港人克服恐懼,團結面對!

岑敖暉妻子:他精神不錯,只係幾日冇剃鬚,好長。(當然我老公仲係好靚仔)佢話好想知過去幾日審訊個陣發生咩事,叫我印左寄去比佢睇(因未有報紙睇),又未有書睇,佢大叫「好撚悶啊!!!!!」大家可以寫信給他,他會好開心。本來以為見到佢會喊到豬頭咁,但見到實在太太太開心,仲有講有笑,我哋用消毒紙巾係玻璃上互畫心心,好開心終於見到佢,我會加油,撐住。

余慧明小編:Winnie 精神唔錯,需要少少時間適應牆內生活,已得到基本物資支援。追車師、旁聽師嘅每一句「撐住」同燈海,Winnie喺囚車入面都一清二楚,好L感動,感謝大家為佢擔心。

發表意見