立場新聞 Stand News

5.1 的褻瀆

2020/5/1 — 15:50

描述 1886 年美國芝加哥「乾草市場事件」的插畫(資料圖片,來源:Chicago History Museum)

描述 1886 年美國芝加哥「乾草市場事件」的插畫(資料圖片,來源:Chicago History Museum)

係,5.1 原本係勞動節,唔係黃金周。

一百三十幾年前,芝加哥二十幾萬工人罷工上街,爭取 8 小時工作制,俾軍警血腥鎮壓,後世為咗紀念呢件事,確立 5 月 1 日係國際勞動節。

當年,搞罷工係叛國、係恐佈主義嘅行為,被視為嚴重破壞社會安寧,有主事者更被送上斷頭台。

廣告

點解咁黑暗,美國唔係好早有民主嘅咩?當時所謂選舉制度,並唔係普及而平等,要睇你有幾多身家財產、教育程度同入息,先至決定你有無資格享有手上一票。

所以,世界民主發展嘅歷程,基本上就係同工人運動、婦女運動爭取平等投票權利不可分割。因為好簡單,工人階級醒覺到,要解除對自身嘅奴役同剝削,就要破除呢種只為管治階層服務嘅選舉制度。

廣告

今時今日,有人口口聲話要紀念 5.1,卻對於壓在工人頭上嘅暴政視而不見,甚至助紂為虐,是不折不扣對 5.1 嘅褻瀆。

所以話,5.1 勞動節嗌「五大訴求、缺一不可」,唔單止好應景,而且仲係非常非常之必要!

發表意見