立場新聞 Stand News

5.24 前八件事

2020/5/23 — 16:55

5 月 22 日,香港眾志於紅磡擺街站,呼籲市民關注「港版國安法」。

5 月 22 日,香港眾志於紅磡擺街站,呼籲市民關注「港版國安法」。

從反送中到反國安法,拜託大家最低限度,要將上年五月尾六月頭做過嘅嘢,搬返出來做一次。

一、昨晚紅磡天橋擺聯合站,反應係唔錯嘅,但記得上年五月尾坐監嘅時候,每日睇報紙就見到勁多聯署、文宣同埋自發街站遍地開花,既然國安法比起逃犯條例黐線十萬八千倍,家陣疫情將近尾聲,想呼籲大家全民街站,大佬網上大家嗌哂救命,好多人可能仲望住昨日跌嘅股市,街站數目真係要多過上年六月九日前。

二、無單張唔知派乜?岑敖暉同埋朱凱廸昨晚砌咗份反國安法單張,再三拜託大家拎去印,唔洗問佢兩個㗎啦,直接 download 就得;另外,乜嘢貼紙周街貼、海報周圍黐,都好需要文宣手足量產,最好 YouTube 戰線嘅朋友都幫手,我地用上年暑假嘅節奏去應對中共接下來嘅攻勢。

廣告

三、仲有跟開教育議題同埋串連學生嘅鄭家朗都有同我講,近排教育界同學界清算得咁黐線,查實都會激發大家想做嘢,咁就麻煩各位校友、家長同埋學生,幫手夾辦學團隊表態;雖然聯署好可能今時今日嘅作用呢,點都無上年五月尾咁震撼,但至少各校反送中關注組,又係時候郁返,尤其係差唔多考完 DSE 嘅學生。

四、去到國際戰線,西方媒體社論發功美國三大報頭條全撐香港、國會議員排隊相繼表態、國務卿正式發反對,國際關注呢兩日明顯返哂來,我同周庭接訪問接足全日無停過,從英美加法德韓日,去到印度土耳其以色列俄羅斯巴基斯坦嘅記者,都問緊我香港發生乜嘢事。國際線人人都可以參與!即刻入:TwitterHelpBot Telegram

廣告

四、街頭點搞呢,就大家都明好難畫公仔畫出腸,但我覺得呢個「5.24 遊行前需要解決嘅四件事」寫得非常好,裡面講嘅幾個問題要傾,而且要盡快聽日前有共識,如果唔係聽日都唔知點好……總之,用唔同方式日間谷人數,至於夜晚就返西方時區一定要用 Twitter 戰線,呢個週末一定一定一定同國際社會講,香港人會繼續抗爭反擊國安法。

五、無論係「Time is running out in Hong Kong」定係「It is the beginning of the end of Hong Kong」,都係我做訪問時會有嘅講法,對比起上年都有兩、三個月時間煲起反送中,依家真係極限挑戰,逼香港人未來兩、三星期,從疫情嘅氣氛,近乎由零開始,唔該大家要將上年五月尾六月頭做過嘅嘢,搬返出來做一次,仲要做得更好!我地有上年嘅經驗,應該會谷得更好,快手,盡做。

六、搞成咁,九月選舉有無用?我嘅答案係:「仲有。」如果仲有投票日嘅話,無論點 DQ,選舉仍然緊要,因為佢確立到國際線同街頭嘅香港民意基礎同認受性,可能大家身處香港唔覺,但國際一定咁睇。我永遠唔會忘記大學保衛戰炮火連天,唔少記者問我沉默大多數點睇,又話香港人 Go Too Far 應該反對示威者武力下省五千字……否則會失民心,點知選舉結果贏到開巷,全部質疑批評收哂聲,更唔好講美國總統就係區選大勝三日後簽法案,令《香港人權民主法》正式生效成為法律;至於制裁,除咗若然未報只係時辰未到,大家都明就算制裁鄧炳強凍結西方國家資產,唔代表中共就會立即收回國安法,總之我會盡力同眾志駐華盛頓常委敖卓軒夾,努力緊。

七、問都唔洗問,全民共識 Top Priority,目前最緊要最緊要呢,就一定係要拉倒中共喺香港實施國安法,成數唔高,甚至係低,我知,但上年反送中,大家 6 月 11 日,咪一樣有咁嘅心情,唔係咩?如果睇完以上呢段字,大家都仍然唔太知有咩身位,想唔到自己一個做到乜嘢,歡迎發訊息去羅冠聰 Nathan Law觀塘願景 - 梁凱晴 Jannelle R. Leung張崑陽 Sunny Cheung何桂藍 Gwyneth Ho 嘅專頁度話想做義工,街站、聯署、文宣、網戰、國際線,大家一定有排忙。

八、最後,想同前日開始 unlike Facebook page,Instagram del 相嘅朋友講,你地洗唔洗驚到咁?驚又好,灰又好,人之常情,我都會擔心,當然有壓力,但洗唔洗去到咁嘅地步呢……細心諗諗,都知國安法通過之後,頭十個、一百個定甚至一千個清算對象,都無你份㗎啦,反而我都預咗榜上有名,但依家咪又係生勾勾喺香港,打咗成篇嘢比大家睇。唔係講到好有希望,家陣形勢當然差到爆,仲要今鋪國安法,大家都知擺明係要清算國際線,但既然時間無多,就只能兵來將擋,同大家一齊留守香港。

儘管拉人封艇,取締眾志不再是空談,留一口氣,點一盞燈,拜託大家幫忙延續國際戰線血脈

存亡號召,絕不撤退。

 

作者 Facebook

發表意見