立場新聞 Stand News

6 月 9 日,上街吧

2019/6/6 — 10:37

「你仲信唔信 五年後
你唔後悔留喺香港?

你仲信唔信 五年後
香港會更好?」

呢兩句,係曾俊華當年參選特首時眾籌廣告嘅對白。

廣告

我成日反覆問自己呢兩個問題。

──────

廣告

送中法,喺執行上等同將大陸嘅司法制度同法例直接應用喺香港(坐七年監以上、香港又有相同罪名)。

諗呢條橋嘅人,其實好聰明。聰明到……唔使修改基本法,效用等同將全國法例應用喺香港。即係,你諗到一個方法,可以將NBA嘅球例直接應用喺英格蘭超級足球聯賽,而唔使做任何大動作同得到持份者支持。你真係天材,可惜用喺壞方面。

特區政府唔使就23條立法咧,因為送中法比起23條更厲害。你批評香港政府、唔同意大陸共產黨、得罪某啲特權分子、喺睡夢中搞長沙灣獨立?大陸一手製造所謂官方證據,話你透過微訊喺大陸買兇殺人、用支付寶畀錢、再透過抖音收得殺人直播(你覺得戇居,但戇居得過李旺陽企喺窗邊「自殺」?),要求引渡你返去,審一審。

你冇微訊?未開通支付寶?冇聽過抖音?放心,大陸官方幫你整一個、甚至幾個,再加上相關指模證據(你有冇申請回鄉咭E 道啊朋友)。而送中法下本港法院無法根據證據是否有合理疑點而拒絕引渡。

放心,你返咗大陸先。我哋好公平公開公正,大陸有公平審訊、公平審訊。(我打「大陸有公平審訊」呢幾個字嗰陣自己都笑咗出嚟)。

呢啲都唔需要經常實際執行,只需三兩年做一個畸士,等你有戒心,自我審查。

雖然上面話唔使23條,但特區政府亦會立法。點解?政府專門做埋啲多餘嘅嘢。再者,有咗送中法,23條變得更加重要:

「香港特別行政區應自行立法禁止任何叛國、分裂國家、煽動叛亂、顛覆中央人民政府及竊取國家機密的行為……」(23條)

只要有「送中法 + 23條」呢個combo,製造引渡證據及引渡嘅成本將大幅下降-喺大陸只要官方唔中意,你連屙屎都有能力分裂國家:史某企圖透過屙塞屎渠,令國家處理污染物嘅系統出現結構性災害,引起社會民眾動盪不安,又勾結外國勢力,利用紙巾傳播分裂國家嘅訊息(喺你屋企發現你用咗美帝巨企Kimberly-Clark嘅Klennex紙巾抿屎),其心可誅。

不不不,上面嗰啲都係我憑空想像出嚟,大陸陽光司法(啲陽光刺眼,刺到睇唔到司法有幾黑暗),所以,譚作人啊、劉曉波啊、李旺陽啊,一樣係我虛構出嚟。

香港已經天黑咗好耐,你一路等緊天光。

前排Game of Thrones結局,舖排咗八季嘅 “The Winter is coming”,只係一集八十分鐘就完結咗;我好希望共產黨嘅下場好似Night King咁,幾秒玩完。

不過,原來最黑暗嘅日子似乎仲未真正嚟臨。

好多朋友已經為人父母。我想同你哋講:如果你有小朋友,每日補習上興趣班當然重要,不過是微觀環境中嘅補充和養份;宏觀大勢一去,覆巢之下,焉有完卵。每日咁辛苦,不過係想小朋友未來嘅生活好啲。香港司法無咗獨立,附庸為垃圾制度嘅一部份,喺度又點會好過?

6月9日,上街吧。

發表意見