假才子

假才子

比較政治碩士學歷,現為傳媒工作者。「假才子」是因為現在流行才子才女,但又沒人敢承認自己是假大空才子才女,故先行澄清。文章寫得不好還請見諒,畢竟我不是真才子。

2019/6/11 - 20:13

6.9 遊行後幾點總結

1. 經濟好都百萬人上街

政治黑暗、群魔亂舞,港人比 03 年更憤怒。講民生,依家係樓價高、街擠擁、服務排長龍,但比起 03 沙士 + 經濟衰退 + 高失業率,都算好過了。所以今次市民出嚟,完完全全就係因為政治黑暗、群魔亂舞,香港不再是香港:

  • 自大狂,咩反對聲都話廢話、無聊、waste time 的特首
  • 經營劏房同派錢都派唔掂的財政司
  • 帶頭犯法的律政司
  • 勾結黑幫、屌市民老母、見市民就扑的警隊
  • 口講愛國但揸外國護照的保皇黨
  • 莫須有 DQ 民選議員(和候選人)
  • 追殺學生不遺餘力的大學高層
  • 大陸有宗教自由都噏得出的教會
  • 擺明公開干預香港自治的中聯辦
  • 「奪」字就係暴力的超強邏輯法官

仲有無數例子,you name it。總之,成個政治同社會已經搞彎哂,香港不是香,今次仲要擺明強姦,真係士可忍孰不可忍,經濟好壞已經唔關事,百萬人上街。

廣告

2. 行動升級不一定等於暴力

但結果,半夜十二點未到就政府加成堆親中派發聲明歸隊,可見北京柯打幾嚴厲。唔好再沉迷咩派系鬥爭陰謀論,送中真係最上頭落的政治任務。

咁到底遊行有冇用,第一就睇你係咪執著有用,第二就睇你咩叫有用。如果你目標係發聲,已經做咗。如果你一定要阻止通過先叫完,咁港府同北京連佔領都唔讓步啦,一百萬人行街佢又有咩所謂?

但衝同勇武係咪有用呢,我都有保留。我覺得依家個正苦同警察根本已經六四咁,講緊天安門嗰個呀,殺死一堆後生仔都照去馬嘅,所以我都唔覺得衝同勇武會幾有用。要震撼,除非真係出人命,或者下次比人扑到頭破血流係一班老弱殘,黑警蝦阿婆/輪椅人士咁,否則後生仔被打都已當平常。

比較有用,講緊阻條例,有三大方向:

一、搏親中議員轉軚令方案唔夠票,即當年田大少咁,但可能性低過當年,因現今中共操控度同親中派聽話度都高過當年。

二、物理上令立法無法繼續,如立法會開唔到會,全港大罷工包埋公務員嗰隻,癱瘓政府運作,但恐怕難長時間持續。

三、外國勢力出招令中共放棄,或令個別親中議員覺得唔值得為依單犧牲。用更 layman 講法就係我死都要拉埋你仆街。要求歐美制裁香港,特別係人身制裁高官、商界、親中派,剝奪佢哋外國護照、限制出入境、凍結資產等。

依啲係完全唔涉及暴力。我要重申,非暴力行動唔係得遊行一種,行動升級亦唔等於使用暴力。講真有 100 萬人行咗出嚟呀家陣,如果肯升級有咩做唔到,如果肯。唔洗用暴力,全部人企硬唔走,警察點打呀,一個打 100 個呀?要比警察知,佢哋家陣唔係清除暴徒,係與全港市民為敵,對手唔係少數激進青年,係全港男女老幼。口罩後生仔打得咁過癮,師奶你打唔打,推 BB 車的大肚婆你打唔打,阿婆你打唔打?打吖,國際傳媒影低哂,香港黑警打阿婆,以後全世界都知香港已經同大陸冇分別。

Bottom line is,我雖然唔鼓勵人哋衝同勇武,因為佢哋被鎖被拉去坐監,我負唔到責任,但我亦唔會批評佢哋係搞破壞、係鬼、搞串個 party。咁你當爭取民主係開 party,唯一准許的行動就係行街,咁我都冇計啦。

至於網上啲五毛假 account 留言嗰啲,算 9 數唔好再被佢哋分心啦,事實證明佢哋唔代表民意。試下佢哋 call 友上街,一萬人都唔知有冇。

3. 撤回 23 條、老董下台,不是單靠民意

仲有要提返大家,當年唔係單靠遊行就令老董落台,依個係好錯的誤解。係遊行後田大少率領自由黨轉軚,令政府唔夠票,政府先撤回 23 條立法。再之後一星期葉劉同阿虫先辭職,楊永強更係一年之後先走。到 2004 年底,老董向胡錦濤述職時,被佢公開訓斥「查找不足」後,05 年 3 月先宣布下台。

所以係遊行後令個別親中派轉軚,管治聯盟面臨崩潰,先引發之後的連鎖反應。老胡嫌老董係江派亦可能係原因之一。成件事唔係單單遊行就搞掂,亦唔係民意壓力直接引發後面,千祈唔好跳 step。跳咗,分析就會錯哂。

亦所以,如果真係想要阻止立法,一日未見到親中派脫隊或者中共轉軚,都要繼續施加壓力,行動升級。但正如我前面講過,行動升級唔一定要訴諸暴力,非暴力行動唔係得遊行一種的。

4. 目標同行動要清晰

其實點解香港推進民主一路都咁難,原因之一係好多人搞唔清目標同手段。好多人仍然幻想串下港府,搞到班官冇面見人,或者動之以理,講咩良好管治行政立法大和解,化解矛盾化解撕裂,就可以令佢哋知難而退,完全唔將重點放在背後操盤的中共。一件事只要係中共柯打,港府同本地打手幾難做都好,如果唔令中共都受打擊,係改變唔到決定,林鄭依啲棋子有咩困難對中共嚟講根本不是考慮嚟,not in the equation。700 萬民意?佢哋 14 億民意都唔理啦。前日示威,在北京的大爺們可能唔會理,頂多港澳辦中聯辦緊張睇直播,班常委可能聽幾分鐘 briefing 就算數,大把其他嘢要處理。家陣習總喺大陸都咁嚴緊,點會鬆比你香港?所以只靠港人示威同動之以情/以理,係唔會夠用。講再多林鄭民望低、管治唔到、連任唔到,係?痕唔止癢。就如當年東歐衛星國,你幾多示威,蘇聯一開坦克嚟就玩完,但蘇聯一收檔唔玩啦,即刻全部衛星政府倒台。

5. 勾結外國勢力

亦都點解一定要驚動外國勢力。要令中共依個咁龐大嘅對手承受打擊 or cost,只有讓同樣層次的對手出手。見到有人話對英國政府失望,我從來都對佢冇期望。一來佢國勢衰落緊,無力對抗中共,二來脫歐在即,佢更加要周圍搵大水喉,中共必定係目標之一。你睇班脫歐派話英國要做新加坡,堂堂大英帝國話要做新加坡,你都知佢哋玩完。

美國係最有機會對抗中共,除咗有實力,亦因為佢係現任世界霸主,中國崛起對佢威脅最大,雙方終會起衝突,正如現在。你唔需要佢真正關心香港民主自由,雙方目標,i.e. 抗共係一致就得了。

歐盟就微妙啲,主要睇德國,法國都唔太可靠。因為德國現時實力比英法都強,同埋多得德國「左膠」重視人權同反獨裁傾向較強。如果綠黨加入埋政府,咁就更值得期望。日本都係唔洗旨意,成日比人話軍國主義乜乜乜,其實外交上好龜縮。

之前睇到人話,點解信外國都唔信祖國。咁你問返孫中山,點解信歐美都唔信慈禧,毛澤東點解信史太林都唔信蔣介石?

 

作者 Medium