立場新聞 Stand News

620 罷工罷課公投ㅤ我慶幸ㅤ有你同行

2020/6/20 — 23:00

作者 Facebook 圖片

作者 Facebook 圖片

今日響應二百萬三罷聯合陣線號召,發動罷工罷課公投,而呢一刻正在點票途中。

夏日炎炎,無阻香港人繼續反極權嘅心情,今日所有人不分年齡,都選擇加入工會或者投下罷課公投。

遊走各區票站最有趣嘅就係同唔係嘅人傾計,傾下大家對於運動嘅諗法,甚至係今日參與公投嘅諗法。

廣告

好有印象嘅係銅鑼灣街站嘅人龍之中,有兩位伯伯問退咗休嘅可唔可以參加公投㗎?當然票站嘅義工都同佢地解釋返,希望參加公投嘅都真係在職嘅人,伯伯嘅心意,我地亦都接收咗。

「我想撐你地啊」,呢一句說話簡單直接,而呢一班銀髮族,亦係延續運動好重要嘅一員。豐有人生經驗嘅佢地,經歷萬千之後繼續選擇企響我地一方,我諗我同好多人一樣,對佢地嘅熱誠,同埋身體力行敬佩,慶幸運動路上有佢地嘅出現。

廣告

慈雲山票站亦有一位媽媽帶同啊仔嚟到票站投票,我問佢「你加入工會驚唔驚比公司秋後算帳㗎」,佢答我驚,但更驚嘅係下一代唔再知道咩叫做公義,變成一個為咗利益而失去自我嘅人。嗰位媽媽亦同我講,「我唔會叫細路仔一定要係黃,但一定要識分辦是非黑白」。教育 — 係對下一代嘅傳承,或者我地並唔係一個完美嘅大人,但我地更希望日後,我地可以好似銀髮族咁樣,為咗下一代,付出無窮嘅勇氣。

最後,我相信今日有嚟投票嘅朋友都知道,除咗罷工公投,今日仲有個罷課公投。而今日我地亦都見識到,我地嘅下一代,已經以難以想像嘅速度成長,不論係勇氣定係能力,都甚至已經超越我地呢一班「大人」。

我慶幸,我自己仲響有氣有力嘅歲月,可以同呢一班手足同行。
我慶幸,呢一班手足選擇相信我地,齊上齊落,不分和勇,實行罷課公投。

或者今日嘅公投並唔完美,但我地知道呢一個唔係終結,而只係一個開始,一個新時代嘅開始。

 

#620公投 #齊上齊落 #不分年齡

作者 Facebook

發表意見