立場新聞 Stand News

7.28 後,全香港都有暴動的青年

2020/7/28 — 22:04

作者製圖

作者製圖

7.21 上環,係黑警將向巿民開槍變成日常嘅開端 。
7.28 上環,卻令全香港都有「暴動」的青年。

6.12 中,五人因「暴動罪」被捕,但未即時被落案控告。抗爭者喺 7.1 中確立「五大訴求」,當中兩點就係撤回暴動定性同釋放被捕抗爭者。而 6.12 後接近兩個月,都再冇其他示威者因暴動罪被捕。

直至 7.28。

廣告

2019 年 7 月 21 日,上環開槍、元朗恐襲,天怒人怨。抗爭者於是發起「7.27 光復元朗」、「7.28 追究開槍大遊行」,結果成為反修例運動中,首次被警方發出「反對通知書」嘅遊行集會。即使如此,萬名抗爭者依然義無反顧再次走到一星期前嘅開槍現場。當日,警察用咗 408 枚催淚彈、95 發橡膠子彈、52 發海綿彈/布袋彈。警察甚至被發現使用疑似過期催淚彈,令無數抗爭者、急救員、記者喺日後一段日子出現各種後遺症。抗爭者依然寸步不讓,為嘅就係追究 7.21 恐襲、開槍責任,以及更加重要嘅五大訴求,「撤回暴動定性」、「釋放所有被捕義士」。

偏偏喺 6.12 過後接近兩個月,警方終於喺 7.28 再次撕破面具,再一次以暴動罪之名拘捕抗爭者。44 名以暴動罪拘捕嘅巿民中,有負責人道救援嘅註冊護士,亦有大家都熟悉,已被判無罪釋放嘅「赴湯杜火」三人。有別於 6.12 暴動案並無即時起訴,呢 44 位於上環被捕嘅巿民,喺拘留兩日後,被直接帶上法庭審訴,正式落案控訴。

廣告

我記得,7 月 29 日,我收到消息指呢 44 人被控暴動罪嘅時候,我喺某處擺緊街站嗌緊咪。

當刻,我憤怒到全身顫抖,第一時間喺街站到不停向路過嘅巿民傳達呢個消息。因為我唔明白,由 6.12 開始、由 7.1 開始,我地一直向政府表達嘅清晰訴求就係「學生不是暴徒」、「沒有暴徒只有暴政」、「釋放義士」,點解偏偏呢個政府執意與香港人作對?

當我地要求「撤回暴動定性」,佢竟然用開槍、用元朗白衣人去打壓我地嘅聲音,再喺 7.28 更進一步,將更多更多嘅普通香港巿民以「暴動」惡法拘捕。

跟住落嚟嘅大半年:

觀塘遊行,暴動。
荃灣遊行,暴動。
8.5 三罷,暴動。
8.11 港島集會,暴動。
8.21 元朗,暴動。
8.31 遊行,暴動。
9.15 港島行街,暴動。
十一國殤,暴動。
反緊急法遊行,暴動。
和你 Lunch,暴動。
黎明行動,暴動。
中大守護戰,暴動。
理大圍城,暴動。

不能盡錄。

截至 2020 年 7 月 25 日,超過 9,000 人被捕,當中約 1,500 人以暴動罪拘捕,超過 650 人被落案起訴暴動罪。


7.28 後,全香港都有暴動的青年。


再過春天,再過秋天,
這裡都不會改變,或者永遠都不變。

如果我們都只願做旁觀的青年。

 

作者 Facebook

發表意見