立場新聞 Stand News

7.27 衝之前ㅤ搞清楚咩嘢係南邊圍

2019/7/24 — 17:17

元朗南邊圍村

元朗南邊圍村

【文:土生土長元朗仔】

元朗仔三十年出入南邊圍經驗同大家分享下。

1. 南邊圍唔係淨係住圍頭人。好多有頭有勢人士早已搬哂出去住 Yoho 住大屋,淨係大時大節(例如太公誕,或者星期日晚)先會嚟聚集,而留低的當然有黑道人有尼泊爾人(佢哋有幾兇狠可以留意返 2012 年南邊圍仇殺案),但亦都有多基層原居民或非原居民(其實唔係原居民就一定有錢),同埋好多貪呢度近西鐵而租呢度的無殼夫妻。冇錯呢度係龍蛇混雜的小城寨,但亦都係民居。

廣告

2. 南邊圍係圍村,但嚴格上佢亦係舊墟的南門。成個舊墟除咗兩個圍之外亦都連住有兩個屋苑(尚豪庭及鈞樂新邨)同兩間學校(鐘聲小學同耀道中學),而耀道中學響假日亦都會開放做禮拜堂。

3. 舊墟一整條長盛街有名滿清一條街,內裡周邊有晉源押、同益棧、大王廟同玄關二帝廟,四個都係一級歷史建築,係元朗老街坊的集體回憶,例如晉源押據小弟所知就是有個八十歲的伯伯定期為之整理,視如珠寶。

廣告

4. 南邊圍之西邊有西邊圍,東有東頭圍英龍圍大圍村,元朗人合稱五和同氣連枝,北亦有屬十八鄉的林氏山貝村,有咩事群起而攻,大夥兒只能向南退,一旦大馬路人潮未散,東南角又係 Yoho 末期地盤,只能經水門頭天橋撤退,而落橋位的泰祥街水車館街一帶,係人煙極密集的社區。

以上都係想話俾大家聽,一旦要衝,你衝的唔係政府建築唔係商業區,係民居,甚至係學校教會。

一旦要衝,你攪到的可能是一磚一瓦不能碰,亦係老街坊的心血古跡。

一旦要衝,唔好彩被圍堵四面楚歌,好彩走得到都可能波及民居。

所以,真係要衝?

我知道要忍得住佢哋的狂暴唔容易,但今舖真係唔可以再兄弟爬山。

幾多人行入元朗,就幾多人行返出去。

發表意見