立場新聞 Stand News

831 一周年感言

2020/8/30 — 22:42

【文:梁柏堅】

「你哋係唔係香港人嚟㗎?!」青年攬住女友向攻擊佢哋嘅警察抱頭哭訴。

呢個係我 831 之後每次半夜夢醒不能磨滅嘅畫面,當時我相信少年講出呢一番說話係因為仍然抱有一絲相信,香港差佬再壞,都不會衝入車廂無差別襲擊市民。

廣告

我親身見證、感受差佬對所有年輕人敵視,濫用武力。佢哋當咗自己係判官,認為「有罪」就未審先判打市民、用胡椒噴霧噴市民、近距離攞槍指嚇市民。

唔好忽略就算當時有市民報警車廂有打鬥,都係觀塘綫嘅事,但我眼見嘅係差佬一衝落嚟就衝咗去荃灣綫嗰邊打人。所有行動根本無依據 —— 唯一嘅依據就係主觀敵視,純粹發洩。

廣告

亦因為親身見證,對我及後思考同行動都有好大影響。因為留守喺理工大學,我無參與區議會選舉嘅最後階段,呢個決定都係因為經歷過 831 —— 我清楚明白,無傳媒監察嘅情況下,差佬根本(亦更加)唔會跟規矩守則去做事。

選舉、議席乜嘢我都可以放棄,或者其實我下意識就係想贖罪,想贖罪返 831 當日我做得唔夠好嘅地方。

一年後嘅今日,我想回顧件事、寫下感言,但我發覺我根本唔能夠每件事獨立去評論,因為整個感覺已經係將 831、中大、同理大嘅記憶不斷交纏,負面情緒仍然未搵到出路。

原諒我831一周年仍然未能去出動採訪,仍然唔想去太子站及附近地方出現,唔係食完人血饅頭攞完個席位就冇咗件事,係我真係唔係好頂到,對唔住。我想收埋自己一陣。

差佬唔該你搞清楚,邊個推你哋去民眾對立嘅深淵,唔係市民、唔係記者 —— 係落命令嗰個同放任你哋行為嗰個人。

 

#831一周年
#831太子站
#拒絕遺忘
#守護真相

 

【831警暴】短片

原刊於作者「梁柏堅(表弟) Pakkin Leung」專頁

發表意見