林鄭月娥

回應會否斥資購買世盃亞運轉播權 林鄭:買奧運因為我哋有運動員比賽

特首林鄭月娥今早 (10 日)出席行政會議前會見傳媒,主動提及東京奧運,她指東奧期間,本港各電視台的廣播時間合共二千小時,令全城氣氛振奮。傳媒詢問政府往後會否再購買世界盃及亞運會的轉播權,她表示有否本港運動員參與、能否奪得獎牌是考慮因素。對於下次購得轉播權會否供港台轉播,林鄭未有回應。

記者提問特首,會否考慮仿效東奧模式,考慮以公帑去購入下屆世界盃播映權。林鄭回答說,直播賽事或多或少對本港運動員有激勵作用,「因為佢知道喺香港有咁多人為佢打氣,呢啲打氣嘅場面我地真係隨處可見,所以特區政府喺總結呢呢斥資購買奧運轉播權,以決定日後嘅工作,我地都會考慮呢啲因素。」

港台記者問下次可否轉播 林鄭未回應

不過她指出,以不同國際體育盛事來說,由政府購買奧運轉播權的爭議較小,「因為我哋有運動員比賽,唔係單係一個觀賞性,亦都係一個體育發展裏面重要一環,咁所以以後睇咩賽事做咩嘢,都要從呢個角度來到考慮。」她續說「不過我知道來緊半年後嘅北京冬奧會已經有本地嘅電視台應該購買咗,可以轉播,所以暫時唔係急於要處理呢個問題,有啲時間可以多聽社會嘅意見。」

東京奧運轉播權僅提供予三間私人電視廣播營辦商,公營的香港電台反而不能轉播。今早有記者詢問,港府會否購買亞運會轉播權,若購得轉播權會否提供港台轉播。林鄭未有回應關於港台的問題,至於亞運轉播權,她說:「如果有香港運動員參加,係好有機會攞牌,當然係一個我哋會考慮嘅因素,咁你都知道,我地喺亞運嘅成績遠遠比奧運嘅成績好,而且係一屆比一屆好,呢個係香港屆時會考慮嘅因素。」

她續指,洽談轉播權的談判需要保密,「即係當有人知道你一定會買,邊度有得傾呢?價錢一定係冇得傾,啲條件一定係有咁辣得咁辣。咁所以對唔住嘞,同你講得一定係買咗,就唔會預先大鑼大鼓咁話我哋打算去買喇。」她又認為,幾間私營電視台也可以合作洽購轉播權,「唔好去爭,令到個價錢越炒越高。」

編輯推介

    發表意見