立場新聞 Stand News

DSE 試題風波

2020/5/24 — 10:00

過去一星期嘅中學文憑試歷史科試題風波,伸延至昨晚考評局決定取消其爭議嘅試題,並會以卷中其他試題的表現酌量調分。教育局認為題目中嘅參考資料不全面,亦質疑題目能否與應考學生的能力是否相符。究竟該開放式試題會否有所誤導?另外,考生亦需「就他們所知」作答,會否反映課程喺未來有調整空間?而今次考評局取消試題事件,又會否對其國際認受性有所影響?

2020年5月23日香港電台第一台 - 政壇新秀訓練班《第五十九集》邀請到教育界立法會議員—葉建源來到節目分享與討論「DSE試題風波」,當中亦有政壇新秀們嘅親身感受及提問~~節目重溫

上星期開考嘅中學文憑試歷史科,其中嘅題目需要考生就卷中參考資料及其認知,評述是否同意「1900-45年間,日本為中國帶來的利多於弊」而引起軒然大波。有人批評題目嘅參考資料誤導學生,並美化日本侵略戰爭,嚴重傷害中國人嘅民族感情,教育局甚至要求取消考試題目。但根據中國不同嘅文憲紀錄,例如:《毛澤東外交文選》、《毛澤東卷》、《毛澤東私人醫生回憶錄》等顯示毛澤東多次喺外交場合向日本政治人物表示感謝日本侵略中國,咁又算唔算係傷害民族感情?

廣告

另一方面有聲音認為題目並唔存在史實上嘅錯誤,而且屬於開放式試題,學生可以自由作答。學生能否考取高分,著重佢哋嘅批判思考及對學科嘅認識。教育局嘅做法唔單止係政治施壓,干預學術自主,取消題目亦會嚴重干擾改卷過程,對考生唔公平。

早前教育局表示行政長官可以引用《香港考試及評核局條例》第 13 條,以「對公眾利益有影響的事項」為理由,向考評局發出指示,包括取消試題。今次歷史科嘅爭議,又算唔算係政治干預學術呢?而喺今日嘅政治環境下,經常出現針對教育界嘅批評,例如通識科令學生變得偏激,令到青年人參與社會運動嘅原因;而教育局針對中國歷史科教科書嘅用字審查又被指灌輸政府嘅既有立場,意圖打壓獨立思考;甚至,部分政治敏感嘅議題會被指「踩中紅線」,唔可以公開討論。之前林鄭月娥表示教育唔可以係「無掩雞籠」,而新華社則認為需要建立與『一國兩制』相應嘅新教育體制,甚至點名批評葉建源。喺咁嘅環境下,教育同學術專業又如何自處呢?

廣告

今集政壇新秀訓練班,請嚟教育界立法會議員葉建源,同大家一齊分析下今次爭議嘅前因後果,以及喺目前政治環境下,教育界如何自處。

有請 葉建源議員。

發表意見