立場新聞 Stand News

It’s Discretion, stupid.

2020/2/18 — 23:42

網絡影片截圖

網絡影片截圖

其實,我去到社交場合,遇上有內地官員,或有某啲方面嘅名人前輩等在場,需要套下交情,都會講一兩句咩向你請教呀,我係後輩呀,你地勞苦功高呀,你地任重道遠呀之類嘅客套話。哩個禮多人不怪,係謙虛嘅表現。

但如果你話一個人,其實去到係幾萬個紀律部隊嘅阿頭,在私人場合對住一班佢成長時嘅偶像,講一兩句客套話亦無所謂,甚至會讓大家覺得你貼地。

退一萬步。我去過社交聚會,警務廉政入境海關保安教統食衛咁多個部門嘅前任現任高層都在場(係,主人家仲詼諧到同白韞六話我跟過佢前任,真係~),大家一齊同主人家攬頭攬頸來個皮球大合唱,no problem。It’s strictly personal。

廣告

唔係話你要拒人千里,但係在一班下屬面前講埋哂啲肉麻當有趣嘅說話,哪怕你係 star-strucked,但做人總要有同自己高度匹配嘅矜持,尤其係當你係警隊之首,香港保安嘅其中一個最高負責人。原因係你以為在私人場合,毫無防備才醜態畢露,唔緊要;但實情轉眼間,哩啲影像已經比你身邊以為好可靠嘅下屬及其家人,或者係好好朋友甚至崇拜嘅偶像明星們出賣,造成輿論,為上司及下屬添煩添亂。哩個係自己行為舉止嘅 lack of judgment,亦係對在場人士嘅品流一個 lack of judgment。死啦,仲要全場最醒目叫唔好影嘅係林國斌,而影緊嘅反而係退休警司「朱隊友」。

我當年老細同我講,查緊陳裘大咁大嘅案件時連酒都唔夠膽飲,怕飲醉透露案情。作為保安官員,隨時接觸非常敏感資料,亦好多人知道你有哩啲資料,然後用各種方式向你埋手,甚至讓你出醜然後 blackmail 你。哩點先係點解高官要有高官嘅矜持 — 讓人無法找出弱點,保護自己腦裡面嘅機密,先係克盡己任。

廣告

記得進入廉署 A 組,師傅就教落一個字 — discretion,大概意思就是適當時候懂得避免透露敏感資料。因為容易接觸牽涉三山五嶽的案件,年青人又鍾意四圍蒲,記得蒲還蒲,睇場合睇 company,自己要知道咩時候唔好講太多,唔好比人知道自己做邊行。犯罪份子的 ignorance 係執法者最大的鎧甲。自己要有 judgment,要保持 discretion。

鄧炳強,你在錯誤的 company 中,以錯誤的態度,說了錯誤的話。無人話你無私人交朋友的權利。但如果我是你老細,我是中央,你手執整個政府以及中央權貴這麼多隱秘,我會很質疑你的能力及判斷力。

This is never about your freedom.

It’s about your lack of discretion.

 

作者 Facebook

發表意見