立場新聞 Stand News

PK 鄧展示「公、檢、法」合一的軍政府管治模式

2020/3/7 — 22:23

1. PK 鄧上電台接受訪問,為警隊嘅執法再作公開辯護,當中最令人側目嘅就係回應兜八字咁衝向示威人群嘅交通警,唯一嘅懲處就係「訓斥」,並且基於「唔會對公眾帶來危險,所以經已復職」。

2. PK 鄧指出該交通警喺執行職務時違反「交通規則」並非法律所不容許,並舉例指消防車喺執行職務時因為救人而衝紅燈,係法律上容許違反交通規則,嘗試以此合理化該交通警嘅行為。

3. 喺呢到要嚴正指出 PK 鄧呢個說法係徹頭徹尾嘅偷換概念、指鹿為馬,用不合理嘅比喻意圖淡化該交通警嘅違法行為。

廣告

4. 首先,公眾對該交通警嘅質疑並非如 PK 鄧所言「違反交通規則」,而係「蓄意危害他人身體」,使用不合比例嘅武力作出驅散,有意圖地用電單車不止一次地撞向人群,呢項武力喺警例上係並不容許,屬於不合法嘅武力。所以用「違反交通規則」之說係有意圖淡化成件事嘅嚴重性同刑事成份。

5. 再者,「消防車因為救人而衝紅燈」係完全不能夠類比。法律上有明文規定某些車輛喺特定嘅情況下可以不遵守交通規則,呢啲豁免係法律上寫明,但係「用電單車衝向人群驅散」並無法律基礎,唔係 PK 鄧自己講係就係。

廣告

6. 再退一萬步講,即使消防車因為救人衝紅燈而撞到途人或其他車輛,該司機都有機會被檢控,可否用執行職務作為合法抗辯理由,豁免其法律責任,都要經過法庭嘅審訊先可以決定,唔係消防處長一句「正在執行職務」說了算。

7. 就好似個個警務人員都有槍,喺執行職務時開槍某程度上都係法律賦予俾佢哋嘅權力,但係唔代表警員開親槍都係合法。如果有人隨地掉垃圾犯咗法,有個差佬因為佢犯法開槍射低佢,咁代唔代表佢「執行職務」就一定合法呢?合唔合法條界唔係由執法部門決定,係由法庭決定,咁先係彰顯法治。

8. PK 鄧喺電台嘅講法,根本就係越俎代庖,用執法部門嘅身份,僭越司法,真正「公、檢、法」合一。只要佢作為執法部門首長唔作出拘捕,就等同作出不檢控嘅決定,更妄自下咗該交通警無違法嘅判決,並以「訓斥」作為懲罰,係徹徹底底嘅越權同濫權行為。

9. 香港「法治已死」最大嘅原因係指警方好多時繞過咗法庭,選擇性執法或不執法,存心包庇(交通警事件、兩次槍擊示威者事件、槍擊印尼女記者致盲事件、 7.21 元朗鄉黑事件),系統性地建立咗屬於警謊嘅一套「司法系統」,用濫捕、濫告、刑事拘留、不准保釋等手段去實行 PK 鄧嘅賞罰制度,淡化法庭司法獨立嘅角色。PK 鄧自己擔當執法、調查、檢控(或不檢控)、解釋法律、裁決、判刑嘅角色,確立軍政府嘅高壓統治模式。

10. 更加可恥嘅係佢作為執法部門之首,公開下個人判斷,用似是而非嘅類比去混淆視聽,意圖引導公眾嘅觀感,目的為操縱軍政府現時尚未能夠掌握嘅一個範疇:輿論。

11. 近日警謊動靜不斷:一邊不停出鏡作公開解說,對外混淆視聽、合理化行為,對內鞏固警隊內部士氣,確立警謊超然嘅地位;一邊高調打壓香港電台同《頭條新聞》拘捕黎智英、針對前線記者採訪,目的都係為控制輿論。

12. 呢啲手段只係全面操縱傳媒輿論嘅第一步,跟住落嚟嘅就係網控、收緊網上言論,以「煽惑」罪名打壓自由;最後推動廿三條立法,成為打壓言論自由、新聞自由嘅最大武器,將大陸嗰套直接搬落嚟香港,由 PK 鄧實行全面管治先係最終目標。

13. PK 鄧話「係時代選中咗我」並唔正確,應該係話「中共選中咗佢」成為扼殺香港自由民主嘅劊子手。

發表意見