立場新聞 Stand News

親歷理大被圍困慘況 有人遭警棍一下打爆頭顱 急救員:很多 FA 不敢再上前線

2019/11/29 — 12:37

被困理大三日兩夜的女急救員 Alice, 在昨晚(28 日)的尖沙咀「聲援理大﹑反對圍捕」集會中分享在理大中所目睹的慘況,有人被警棍打至頭破血流,有人為殺出一條血路而傷得不堪入目。Alice 以「戰場」來形容理大,受傷的不只是示威者,很多她認識的急救員,經過理大圍城戰後,都表明不敢再上前線。 

上周日(17 日), Alice 和隊友食飯時,得知理大爆發嚴重警民衝突, 隨即前往理大支援學生。其後水炮車到場,衝突開始升級。當晚,在理大的示威者漸漸減少, 而留守的人卻亳無意欲離開, 她和其他的急救員開始為去留掙扎。在猶疑之際, 她們從網上得知有一班急救員被警方鎖上手扣或索帶拘捕, 「其實無論如何都被人拉嘅話, 我地就決定留現場,因為現場都有為數不少嘅學生。」

「落場以嚟,我哋係真係冇喊過,但嗰晚,所有 First Aid 都圍住喊,我哋唔知道嗰晚會唔會係我哋嘅最後一晚。」

之後展開漫長的理大圍城, Alice 和其他急救員深知無法離開, 「啲學生仍然選擇奮戰到最後一刻嘅時候,我哋唯有繼續陪大家奮戰到最後一刻。我哋圍埋寫遺書,寫畀我哋嘅屋企人, 寫畀朋友,我哋覺得我哋冇第二個朝早可以見到大家。」校內一片愁雲慘霧, 校外卻戰火連天, 警民衝突越演越烈, 一眾急救員亦無時間低落,「喊完之後, 我哋就知道要返崗位, 我哋要繼續做我地要做嘅野」

理大示威者的傷勢, Alice 以「恐怖」來形容。 她見過有示威者頭部有嚴重裂傷,由頭頂後腦的「鑽」位, 延伸至頭頂蓋前, 「我問佢『你點整親㗎』, 佢話佢俾警棍打, 打一棍啫。」

亦有一班勇武示威者希望「衝出一條血路」, 好讓被困的人離開, 「其實佢地真係好傷」。當中一名示威者的下巴裂開一條又長又深的血痕, 「可以見到骨」。 如此慘烈的情況, 讓 Alice 在醫療室外被嚇呆, 「我真係企左喺度......究竟呢班嘅學生做錯左乜嘢?」

Alice 透露,理大內有學生自殘,背部有開放式傷口,傷口更開始發炎。據她所知,理大內有 5 至 6 名示威者有創傷後遺症的症狀, 「其實可唔可以救咗佢哋先, 而唔係繼續去圍困佢哋」。

「拉人係咪咁重要?比學生嘅身心靈更重要?其實佢哋只係十幾歲學生,點解要咁對佢哋?」

患上創傷後遺症的不只是在理大內的示威者, Alice 透露, 不少急救員亦不敢再上前線,「今日我問『有冇人可以出嚟做 First Aid 呀?』,好多人都話『我真係唔夠膽』﹑『我估我要睇下醫生先』﹑『我唔係好頂得順』。」

Alice 回憶在理大被困的日子: 「連我地 First Aid 都真係頂唔順個種圍困嘅感覺,我地都想搵路走」, 後來有人成功逃出, 有人被警方「抄牌」後獲准離開, 但離開了理大, 亦要時時擔心隨時會被起訴,「 呢一種煎熬原來真係好驚, 更何況一啲小朋友直接被拘捕,我諗我係難以想像佢哋嘅感受。」

 

發表意見