立場新聞 Stand News

【STEM 係未學行先學走】5 樣真係要學嘅科技嘢

2020/5/27 — 14:39

作者製圖

作者製圖

【文:may june july】

好多學校都搞緊 STEM。

依家小學好多時都教編程 (coding), 即係教寫程式嘅基本邏輯運作。仲可能會自己設計啲 app 同機出嚟。

廣告

但係呢度話你知,搞呢啲嘢其實只係因為呢幾年 hit。

阿 May 細個嘅時候,學校大搞環保教育,有得做環保小先鋒,種菜,用廢物整玩具車。

廣告

大個做老師,校工同我講,學校三色回收桶啲垃圾,會倒埋一個桶掉咗去。

學生係學咗好多環保嘢,但係當初搞,只係因為嗰排 hit。

同樣地,依家小學生因為 STEM 學咗啲 fancy 嘢,除咗因為科技急速發展,遲早會有新科技,會無用之外,仲會因為日常無得用返啲 skill 出嚟,轉個圈就唔記得咗。

不如等小朋友學返啲基本嘢先?

1) 打電話

小朋友日日都攞住部手機打機,有冇諗過佢識唔識打電話?

記住屋企人電話號碼,係求生技能嚟,阿 May 真係見過小學生蕩失路,人地想幫佢聯絡屋企人,因為唔知電話號碼,聯絡唔到。

除咗㩒電話號碼之外,識唔識用電話嚟約時間, book嘢?屋企人訂位食飯,book 牙醫,髮型師,寵物美容,其實講錯嘢都無傷大雅,不如試下俾小朋友打電話 book?

仲有留言要講啲咩,電話錄音嘅電話點㩒掣,點處理 cold call,邊啲係電話騙案,大把嘢學。

2) 用一部有滑鼠,有 keyboard 嘅電腦

望下你小朋友學校時間表有冇電腦堂?無嘅話,可能佢連滑鼠都唔識用。

屋企有 desktop 機,可以教下小朋友㩒唔同制,用下小畫家。咩手指㩒左鍵右鍵,兩個制功能上有咩分別,click 兩下會做到啲咩 -- 全部都要教先會識。

另外仲有打字。Typing Club 係個好好嘅網站,可以免費學打字。之後有時間可以學埋打中文,最好就倉頡啦,唔係遲啲中學做 IES, 大學打 paper 都仲用食指督督督,督都督到傻。

其他功能,例如複製剪下貼上原來有 short cut, 點樣 screen cap,唔教都係唔會知。

另外就係上網。我見過有五年級識㩒 apps, 識拍片上抖音,但係唔識開瀏覽器,打個網址落去。

依家咁多網上功課要跟,識唔識打學校網址?入到去識唔識搵功課喺邊?想睇活動相又喺邊? Reading 成日話要睇唔同文體,其實 website 都係個文體嚟。不妨中英文網都㩒黎睇下學埋英文。

3) 查資料

基本上,學校嗰啲 coding 嘢唔洗上堂學。識搵嘅話,我肯定 YouTube 或某網址一定有晒教學。

未來嘅科技一定同依家唔同; 唯一有用嘅 skill 肯定係 learning skill。

下次有嘢要查資料,不如教小朋友查?食飯去邊好可以睇 openrice,煮嘢食方法可以睇 YouTube,喺 Google 查,睇 daydaycook。

之前 TED 有個音樂神童自學六種樂器,都係靠喺 YouTube 逐秒 pause 嚟睇人地啲手指點郁。

當然要學埋有啲咩 source 信得過,做 critical reader,抱懷疑態度睇資訊。

4) 電郵同基本郵政概念

有聽過小六學生唔知寄信係咩意思。唔知佢幼稚園嘅時候有冇學過?阿 May 好記得自己幼稚園嘅時候老師教寫信,放入信封,貼郵票,寫自己屋企地址,寄封信俾自己。

唔好講大個出邊做嘢,依家好多聯校活動報名都係要自己寄份 form 去。大人要填 form 寄嘢嘅時候,俾小朋友一齊望下學下填下都好。

唔爭在教埋咩係電郵,等佢除咗用 whatsapp,電話,有其他途徑問人嘢。可以學校咩係電郵地址,上款下款點寫,點 attach 圖同文件等等。

5) 基本文書處理

俾小朋友學下用 Word 同 PowerPoint。

下年阿婆生日,不如整個有佢啲相嘅 PowerPoint?依家小學生上堂日日都見老師 PowerPoint, 就係無學自己可以點整返個。

無 Microsoft 的話,可以學下用 Google Drive, Google Doc 同 Slides... 我見好多中年同事都俾幾個唔同 Google account 搞到陀陀擰。


假如你小朋友有時間打 PUBG,睇 YouTube,不如叫佢用呢啲時間,用科技幫你手。學咗呢啲 skill,大個咗起碼識基本文書嘢,有問題識用互聯網解決。

 

作者 Facebook

(作者自我簡介 : 新入職香港小學老師,鍾意英文,教育,環保嘢同上網吹水。)

發表意見