立場新聞 Stand News

We connect 終極大佬:淆演物演,你割唔割?

2019/10/27 — 12:04

資料圖片:譚仔雲南米線(網絡圖片)

資料圖片:譚仔雲南米線(網絡圖片)

食爆重慶大廈之後又爆出譚仔曱甴風波,網上一時鄉音四起。好啦笑咗人地口音咁多年,今次你會唔會 connect 埋新移民先?(準備萬箭穿心 mode)

唔同少數族裔,二戰後一浪接一浪南來難民分分鐘係香港主流人口。不同世代「新移民」主要分別在於地域(語言上主要分廣東省及外省人)、大陸經歷事件(如大躍進、文化大革命、四五或六四等)以及到港時身處社會(如七十年代去農業化、八十年代去工業化以及社會福利政策的改革等)。簡單嚟講,九十年代嘅天水圍入伙時正值去工業化,當時新移民入住時已經好難在附近搵田耕,甚至搵工廠返,餐飲服務業就成為唯一出路,再唔係就拎香港人最睇低嘅綜援囉!

先唔講賤視綜援嘅社會風氣害苦幾多真正有需要嘅人,人哋想自力更生返樓面,努力學講廣東話溝通點解唔係值得欣賞嘅事?如果我哋可以同南亞手足共融,點解面對住想努力融入嘅人要恥笑排拒?的確好多同鄉會蛇齋餅糉網絡,但新移民背景多元,絕非鐵板一塊。如果我哋單純以來港遲早去割蓆,我哋至少就會割咗九二年由湖北武漢來港嘅義士梁天琦。

廣告

以口音為恥,其實本質上就係被殖民自卑心態作祟。你有幾何見澳洲人會以咪咪聲為恥?英國口音多元到分分鐘聽唔明,倫敦口音都分好幾種,所謂的「純正口音」其實都係權力構成。如果我哋要自主不再被殖民,心理上首先就要打破呢種英文口音講得唔夠純正嘅自卑,更要消除嫌其他人講廣東話唔正嘅自卑變自大。粵語作為難度高嘅語言,有心學講到聽得明已經好值得欣賞,何苦吹毛求疵?要鬧嘅,唔該先鬧漠視科學數據,硬推普教中荼毒學生嘅教育局!

講吓笑都唔得咩?唔係唔得,而係如果真心想 we connect,就更要將心比己去謹慎言行。正如之前有唔少人話政府搞清真寺之後道歉係「欺善怕惡」、甚至乎拉埋 ISIS 嚟講,就正正係本身覺得穆斯林「惡」嘅投射。無心快話,會對一早同恐怖份子割蓆嘅穆斯林帶來二次傷害。如果你唔肯定笑新移民口音會唔會介意,不如就唔好拎來笑住,多啲溝通了解咗先?

廣告

利申:我阿媽八十年代初由雲南來港,開頭返工廠整電路板,後來做茶餐廳樓面水吧養大我兩兄弟,冇工開時有拎過綜援。廣東話帶有口音,你要割的話,就唔該割埋我。

發表意見