立場新聞 Stand News

一名前線護士致醫管局管理層:前線唔係怕疫症 係怕一班人喺後面搞亂檔

2020/2/22 — 13:39

【文:一名前線護士】

政府同醫管局成日都叫人要齊心共同抗疫,
連醫院內部電郵,每一封臨尾都係加啲咁嘅字句,
有時聽完睇完之後,真係想嘔!

齊心抗疫呢樣野,做前線做dirty team 嘅,係真係好齊心。不過唔齊心嘅,反而係啲叫前線要齊心嘅管理層。

廣告

呢班人,真係上咗神枱就唔知民間疾苦。口口聲聲話要保護前線,偏偏就為咗一啲唔合理嘅原因不斷將自己嘅防線向後移,究竟你呢班人係咪想有前線出事先安樂?

老實講,未開始打抗疫戰,未有反修例運動之前,前線醫護嘅士氣,從來都無高昂過。
源頭就係呢班管理層一直無視所有問題嘅根源,淨係識不停地將程序簡單複雜化,以為加多幾層閘就可以防止事故發生。

廣告

你唔想火燭嘅時候俾火燒親,你諗住不斷著衫著到好厚就會無事。
但係個問題係,你啲衫又唔係燒唔著嘅,你著到好似個鐵甲人咁就變咗重到走唔出火場,燒下燒下咪又係會燒死。下下做埋啲治標唔治本嘅措施,有乜嘢用?

平時啲管理層,就算係同一個部門,都係會勾心鬥角,同大台啲劇一樣呀,為咗權力不擇手段。
無事就話大家係一家人要互相幫助,有事就話呢啲嘢唔關我事,你自己揹返鑊。個個都覺得自己好勁,人哋就永遠都係最廢最得閒,但係偏偏就唔知自己講完呢啲嘢,其實就俾人笑緊佢連啲好簡單嘅嘢都唔識。

好喇,到反修例運動,啲不合理嘅濫權事件,甚至有暴力事件喺醫院發生,啲管理層就唔見晒人。淨係識講醫院唔係表達政治問題嘅地方,咁是非黑白呢?良知良心呢?病人安全同病人權益呢?就隻字不提。仲要不停打壓員工言論自由,連一個表達意見嘅連儂牆都容不下。寧願犧牲醫院其他事務,都要抽人去拆連儂牆,簡直係荒謬絕倫。

疫症爆發之前,一個二個就抱住心存僥倖嘅心態,乜都唔去準備。到殺到埋身先開始諗應變計劃,個計劃仲要搞極都落實唔到,出咗嚟又有百九幾二萬樣嘢錯。大佬,其實你哋開會傾啲咩嘅呢?

到而家爆緊喇,前線話你知有啲咩係唔夠,有啲咩係唔妥,又唔去處理。淨係識出埋啲新聞稿譴責呢樣嗰樣,講埋一大堆語言偽術,諗住可以呃到我哋咩?做埋一大堆野去維穩,去粉飾太平。大佬呀,你哋唔係幫緊前線,係打擊緊前線對你哋嘅信任,係衝擊緊前線抗疫嘅決心呀!

你估你落嚟巡就得架喇!?
你哋落嚟巡,我嫌你阻街呀!有啲野講咗你都唔識架啦,就算識你哋又唔會幫我哋,咁不如算啦!
一係你就落嚟一齊落手落腳做(我唔排除前線見你唔識做會鬧你),
一係就返去你自己間房,我唔理你瞓覺好開埋啲無謂會都好,我哋真係唔知仲可以擺咩寄望喺你哋身上。

Captain America:Civil War 入面有句對白係咁嘅:
“An empire toppled by its enemies will rise again
But one which crumbles from within, it’s dead”

前線並唔怕任何疫症,
前線最怕就係一班人喺我哋後面搞亂檔。

我哋已經唔期望你哋會支持我哋,只希望你哋唔好再搞埋啲嘢打擊我哋嘅士氣!

如果有任何一個前線出事,你哋班管理層全部都要負責!

講完

#我唔要魚蛋燒賣合味道 #我唔要打氣短片同海報
#我淨係要前線同事一個不能少
#做實事啦diu

發表意見