立場新聞 Stand News

一滴血 15 分鐘家中診斷武肺!有冇咁筍?

2020/3/18 — 16:38

作者製圖

作者製圖

碌碌下 Facebook 見到呢個廣告,聲稱可以驗出血液入面對應武肺嘅 IgM, IgG 抗體,15 分鐘自行家中檢測武漢肺炎,賣呢個測試嘅診所更引用研究指準確度高,聽到都覺得正到有啲難以置信。可以驗出九成陽性個案,但係大家攞錢出嚟兩盒 thanks 前,等我同大家 Fact Check 埋先。

結論:病發初期唔可靠,會漏診一半病人,會害死人的。乖,睇醫生。

一般嚟講,驗血液入面嘅抗體(Serology),都需要一段時間,等身體對病原產生免疫反應之後,先會可以驗出陽性,冇咁適合喺病發早期及早診斷。相反,現時主流診斷武肺嘅方法,即 RT-PCR,可以直接檢驗樣本(如深喉或唾液)樣本中有冇病毒嘅基因存在,唔需要等身體免疫反應,可以較早期診斷。呢個就係理論上呢個「家中檢測」最大嘅問題。

廣告

我搵到指呢個「家中檢測」有 88% 靈敏度嘅論文嚟睇 [1]。論文指 397 個經 RT-PCR 確診患武肺嘅個案中,有 352 個病人都喺呢個「家中檢測」陽性。

問題係:論文並無數據提及呢 352 個陽性病人喺病發幾多日後接受驗血,只有其中 58 個嘅數據,而呢 58 個入面,係喺病發第 8 日至第 33 日接受檢測。咁究竟喺病發早期,例如頭七日,驗血係咪真係可靠呢?呢篇論文絕對比唔到答案我地。

廣告

於是我搵咗另一篇論文關於武肺嘅抗體反應 [2],就搵到答案:無錯,呢篇論文亦指出病發 15 日後,研究當中 100% 病人血液中都有抗體被驗出。但同時更重要係,病發首 7 日只有不足四成病人血液中有抗體!同時段中,透過 RT-PCR 檢測病毒基因嘅靈敏度則較高,達 66.7 %。而如果結合兩者,喺首 7 日嘅靈敏度可以達約 80%。而一般相信,重覆檢驗可以進一步提升準確度。

相信大家如果唔好彩染病,都係想喺病發早期盡快得到診斷,避免病情惡化同傳染親友,所以如果呢個「家中檢測」喺頭一個星期準確度不足一半嘅話實在係唔可取。一如之前討論嘅布口罩、銀離子,我最擔心有人有病徵,但透過呢個「家中檢測」驗出陰性之後,就大感安心,唔睇醫生,結果令自己同身邊親友受害就大件事了。

成日講,冇一個檢查方法係完美,所以醫院入面,醫生可以透過多重測試,結合驗抗體、驗基因,或者重覆多次測試去得出準確診斷。所以容許我係度再三強調:如果有懷疑或者有病徵,我求下你唔好依靠網上宣傳嘅所謂「自行檢測」,為咗自己同身邊親友,以至成個社會嘅健康:睇醫生!睇醫生!睇醫生!

最後容許我不負責任,不科學地加一句:呢個「家中檢測」套裝係中国研發中国出產嘅,你唔係信呀?



#除了騙子 #甚麼都是假的

[1] Li, Z., Yi, Y., Luo, X., Xiong, N., Liu, Y., Li, S., … Ye, F. (2020). Development and Clinical Application of A Rapid IgM‐IgG Combined Antibody Test for SARS‐CoV‐2 Infection Diagnosis. Journal of Medical Virology. doi: 10.1002/jmv.25727
[2] Zhao, J., Yuan, Q., Wang, H., Liu, W., Liao, X., Su, Y., . . . Zhang, Z. (2020). Antibody responses to SARS-CoV-2 in patients of novel coronavirus disease 2019. 2020.2003.2002.20030189. doi:10.1101/2020.03.02.20030189 %J medRxiv

作者 Facebook

發表意見