立場新聞 Stand News

一生懸命 — 黎青龍

2021/3/2 — 22:53

【文:黃卓鵬(香港大學醫科生)】

如無意外,竟然成為咗黎龍教過嘅最後一班醫學畢業生

既然都已經咁多人講佢,我都忍唔住,分享一下我喺瑪麗內科個半月嘅時間,最記得黎龍講嘅一句話。

廣告

“When I was your age, median survival of HCC was 3.5 weeks. Now, for unresectable HCC on TACE, median survival can be 6-8 months.”

呢一句話背後,係佢一生嘅努力。

廣告

教授話佢好似我地咁大嘅時候,一半嘅肝癌病人,診斷後只會存活多 3.5 星期。而幾十年後嘅今日,即使係遲發現所以生到好大、或者其他負面因素,無辦法用手術切除嘅肝癌,中期存活都可以去到 6 至 8 個月。當中呢八倍嘅改變,喺呢五十年間,造福咗幾多個病人、幾多個家庭嘅人生?

我今日再去求證呢個講法,就見到,原來 3.5 星期呢個數字,出自 1979 年黎教授自己嘅研究。順帶一提,1979 年嘅時候,教授已經喺港大教書、喺瑪麗診症咗八年。

而我再嘗試搵香港肝癌中期存活嘅最新數據,最新嘅,係搵到 2016 年嘅學術文章,引用 2006 年嘅研究,指香港肝癌整體中期存活(手術及非手術治理),去到 11 個月。而呢兩篇文章/研究,研究員名單同樣有黎青龍教授之名。

肝癌,係香港第三位癌症殺手。五十年間,香港醫療與肝癌嘅戰爭中,辛辛苦苦爭取返嚟,每一個病人可以活多一個星期一個月嘅進步中,當然有好多好多人嘅付出,但黎教授嘅功勞絕對有份。十六歲入醫學院,廿三歲做講師,行醫教學五十年,研究被引用超過六萬次,教出嚟嘅醫生,超過九千人。

大概無幾多人,可以如此為一份事業奉獻終生。

又,分享下關於黎教授另一個研究範疇 — 丙型肝炎。我望住佢嘅 PowerPoint 嘅其中一張,寫哂每一步治療嘅突破,由 1986 年治療成功率係 6%,去到 2016 嘅 100%,呢一切嘅醫學發展嘅推進,佢都係其中之一員。

佢用咗一生,去貢獻俾香港嘅病人、公營醫療體系、香港醫生嘅培訓。佢絕對值得一份一生嘅榮譽。香港大學俾唔俾「榮休教授」呢個名銜佢,從來唔係一個有考慮空間嘅問題。

喺佢身上,我學到嘅唔係大家考試前怒背嘅 “CL Lai GI Notes”,而係一份燃燒生命去造福世人嘅醫者精神。

一位一生懸命嘅醫學巨人 — 黎青龍教授。

發表意見