立場新聞 Stand News

一起突破資訊封鎖 — 問爆財仔波

2019/3/12 — 13:31

本土研究社製圖

本土研究社製圖

從事民間研究嘅最大困難就係缺乏研究資料。好多有爭議性嘅政策,政府都會迴避向公眾交代細節。例如去年土地大辯論,政府連最基本嘅土地、規劃數據都唔交代清楚,然後搏大家唔知,強推自己想推嘅政策(如萬億人工島同公私合營發展農地)。類似情況不但出現係土地政策方面、各項影響民生嘅政策,例如城市規劃、房屋、社福、醫療、食物安全等等,都有以上「唔清唔楚」嘅狀況,資訊封鎖窒礙民間、以至學術界從事政策研究,到頭來管治質素惡化,受害嘅係每個香港人。

為咗扭轉呢個狀態,本土研究社連續第三年同立法會議員合作,係嚟緊審議財政預算案嘅「特別財務委員會」會議,炮製咗 256 條尖銳嘅政策問題,交俾立法會議員要求政府全面交代。呢個行動除咗能夠迫政府停止「唧牙膏」外,仲提供極大量最新政策資料,幫助議員議政之餘,亦提供極寶貴嘅政策資料作民間研究。

呢 256 條問題,涵蓋土地、城市規劃、房屋、社福醫療,以至中港關係、檔案法、資訊自由法等等不同急需加強民間同議會監察嘅政策範疇,實行「問爆財仔波」— 今年政府洗咗幾多錢落研究大灣區跨境基建?各項中港跨境合作、人才入境計劃詳情為何?未來有否計劃改善公私營醫療失衡?未來綠置居政策會否侵蝕公共房屋資源?

廣告

第一輪 256 條問題已經全數交俾 5 位立法會議員代為質問政府,為進一步加強「公眾參與」,我哋現在向大家收集更多政策問題(inbox 我哋),題材不拘,但最好係政府多年「唧牙膏」嘅政策範疇,如果適合的話,我哋會提交比議員在次輪「特別財務委員會」補充問題環節(今年四至五月)代為質問政府,咁樣先係真正嘅「公眾參與」呀嘛!

 

廣告

一齊打爆波叔
? 了解更多 
? 支持我們 

本土研究社 Facebook

發表意見