立場新聞 Stand News

上水石湖墟

2020/9/6 — 16:07

光復街(作者提供)

光復街(作者提供)

【文:local9up】

上水已經完全被水貨客淪陷咗?上水嘅老店已經被藥妝店取代?上水logo就係水貨?答案係好大程度上正確。不過!我同時都可以好肯定咁講上水唔係得水貨客,仲有好多值得同其他區居民分享嘅地方。

上水石湖墟可以話係最受水貨客影響嘅一帶,但同時都係最多值得行嘅地方。值得一提,近排先知原來石湖墟有條巷仔叫光復街,傳聞係國民黨老兵想有光復嘅一日而改嘅,佢嘅光復遺志會唔會有人可以替佢去完成呢?係光復上水到有條光復街都幾微妙,巷內有水貨發貨地方,而依條光復街係一條由水貨街(新康街)通去連接垃圾總站嘅道路,而點樣去解讀依條巷地理位置可能都係一個有趣嘅位,不過最終亦好可能純粹只係一條被埋沒嘅巷弄,將會好似標示光復街嘅字樣一樣咁褪色。

廣告

其實石湖墟好細,如果只係就咁行一圈可能十五分鐘就已經行得晒,佢係由三條道路馬會道、龍琛路同新豐路包圍住嘅地方。而喺成個石湖墟入邊,最可以代表到舊墟嘅,個人認為係巡撫街。一方面依條街受到水貨客影響相對嚟講比較少,另一方面依度可以話係石湖墟嘅發展開始。

周王二院組織物業

周王二院組織物業

廣告

對於巡撫街個名由來,先前有個post已經提過下,係到就再簡單講多次。巡撫街未有之前,嗰度有間報德祠,係紀念清朝兩位巡撫周有德、王來任對復界嘅貢獻,墟市亦慢慢形成。不過喺1955,1956年石湖墟發生兩場大火,報德祠連同幾乎整個石湖墟付之一炬,之後英政府重建,將其中一幢建築物變成「周王二院」嘅組織物業,新界極有影響力嘅五大原居民鄧文廖侯彭都有代表係入邊。而附近一帶嘅街道係大火後就用「新」字做開頭,象徵去舊立新。所以可以話今日嘅石湖墟面貌係由巡撫街陸續發展而嚟嘅。我哋無法參與過去,但會發現過去嘅歷史隱約地同我哋依家生活有關。

戰前唐樓

戰前唐樓

而巡撫街連接嘅新勤街(其實都係一條巷仔),係度可以睇到好有建築價值嘅戰前唐樓同包浩斯(Bauhaus)建築。戰前唐樓屋頂寫住1933,如果據網上資料所講,1933年興建嘅應算係第三代香港唐樓,不過我覺得依幢唐樓可能係第二代,因為見到係用第二代建築物料特色嘅磚同水泥(其實仲有木,但依幢唐樓外觀上睇唔到有),而第三代唐樓就只係用水泥而建架啫。依個純粹只係我用肉眼觀察所得出嘅結論喇(Btw其實係隔離街都有一列有返咁上下歷史嘅唐樓;而喺巡撫街嘅唐樓個人就覺得幾特別,其他區未必見到)。若果再係戰前唐樓到行前幾步,就去到依家係食物安全中心辦公室地方,嗰度係包浩斯建築。包浩斯建築特徵係白色外牆、幾何、向橫發展、直角等等,上水食物安全中心辦公室地方都睇到依啲特色。喺被喻為水貨之城嘅上水,一條巷竟然就可以睇到兩大唔同建築風格。

包浩斯建築風格的上水食物安全中心辦公室

包浩斯建築風格的上水食物安全中心辦公室

新界上水粉嶺沙頭角疋頭洋服商會書法字樣

新界上水粉嶺沙頭角疋頭洋服商會書法字樣

係巡撫街到又會見到有一棟唐樓牆身寫有「新界上水粉嶺沙頭角疋頭洋服商會」,暫時搵唔到相關資料,但估計係同以前嘅石湖墟滿佈疋頭店有關。舊時石湖墟係經濟活動中心地帶,有一個布業商會包括上水、粉嶺、沙頭角三地都唔出奇。以前成衣製品唔流行,好多人都要買布做衫,就算到我讀書時期,石湖墟都仲有賣布嘅鋪頭,例如已經結業嘅東華疋頭。其實石湖墟仲有保留以前嘅疋頭店通花鐵閘係到,只不過係間鋪變咗賣另一樣嘢啫,可以側証舊日疋頭店係有唔少嘅。

巡撫街的老字號商店中興書局,旁邊是正和隆。

巡撫街的老字號商店中興書局,旁邊是正和隆。

巡撫街仲有好多間具老香港特色嘅樓梯鋪,到依家仲經營緊嘅,例如有補鞋、文具玩具雜貨、修匙等等。而依條街同時有好多間老字號商店,正和隆、馬振興、中興書局、德明書局(以前舊鋪,已搬,仲見到有「德明書局」四字係唐樓牆身)、明記腸粉、鄭德記鐘錶、杜記茶餐廳、陳六記飯店、豐記隆(已得返以前鋪面一半面積)等等,依啲全部都係上水石湖墟有返咁上下歷史嘅店舖,只係一條只係行1分鐘左右嘅街道就有咁多間老字號,可以睇得出仲有一班街坊默默守護住社區, 依啲老字號鋪頭有啲搬嚟搬去都仲喺區內,有啲就當決心唔再做落去嗰陣就發現唔捨得街坊感情,結果繼續經營。

德明書局舊鋪位置和陳六記飯店

德明書局舊鋪位置和陳六記飯店

所以上水真係唔係剩係得水貨客架!!Btw之前都有個post係講上水同時都有好多百年老樹係到!!

其實以上嘅事物都係依一年來發現同有組織串連埋一齊。一直無留意一方面係因為以前充斥水貨客而唔願喺區內逗留;另一方面係香港地生活節奏急速,好少會停落嚟欣賞身邊事物,做事所有嘢都係趕、趕、趕!又或者手機不離手。似乎喺「正常世界」一直用咗不正常生活方式。誓估唔到一場疫症,將成個「正常世界」反轉,反而令我重返自己社區,喺同社區斷裂時,無主動去搵任何關於社區消息,對社區記憶可能懸浮係十年之前。重返時發現其實石湖墟某程度上變化都唔係真係咁大,另外發現有啲老店經手嘅已經係佢哋家族第二代,感覺幾得意,好似電影剪接咁,一下子去咗第二個階段。  

作者 Facebook
 

發表意見