立場新聞 Stand News

中國武漢疫情的沙盤推演

2020/1/26 — 14:49

武漢肺炎席捲全國,春期間全國恐慌,如果根據已公佈對新型冠狀病毒嘅資訊,武漢肺炎對全國嘅影響絕不樂觀。病毒潛伏期約七至十四日,期間可以無發燒,但係可以兩邊肺已經花哂;無病徵但極具傳染性,家庭傳染性可達到 83% 之高,好多案例都係全家感染。入院死亡率可以達 15%,差唔多七個人就有一個人會死,死亡嘅原因係肺部因為炎症而被破壞,缺氧而死。

武漢肺炎的死亡率很低?

武漢肺炎開頭被人低估其嚴重性原因之一,係因為佢嘅死亡率比沙士低好多,覺得佢毒性唔強,所以有所鬆懈。但係死亡率喺開始嘅時候低除咗因為報細數,另一個原因可能係重症肺炎病人可以用「ECMO」(extracorporeal membrane oxygenation,體外循環機)續命。ECMO 就係用人工嘅方法為血液注入氧氣,暫時代替肺部嘅功能,維持生命,等到炎症過去,肺部可以重新運作,就可以脫離 ECMO。呢個過程快則幾日,慢則要一個星期,當一個病人佔據咗一部 ECMO 嘅時候,除非佢死咗,或者好番,係甩唔到部機,一旦之後有以幾何級數倍增嘅重症病人,所有 ECMO 機好快就會飽和,而遲感染嘅重症病人得唔到 ECMO 續命,死亡率高速攀升。而呢個技術喺十七年前嘅沙士並未被廣泛使用,所以沙士一開始有好高嘅死亡率。

廣告

武漢疫情經已席捲全國

武漢肺炎早喺十二月初就發現,一直隱瞞大疫情,唔對外公佈嚴重性,去到 1 月 20 日習總公開發「重要指示」後,疫情全面爆發,先至有一連串封城、停高鐵、停飛機嘅措施。呢四、五十日之間喺武漢嘅隱形患者已經流通全國,整個 containment 圍堵策略根本係走喺疫症之後。大陸為咗隱瞞疫情同減低政治動盪,每一步棋都係被迫而行,實際上整個中國大陸抗疫經已失控。各個省城都各自為政: 北京為保中南海主動封城,停止跨省交通湖北十三市已經封城,城內亦停止一切私人車輛行駛;江西省政府自發堵塞往來湖北嘅陸路交通;廣東省汕頭市由 1 月 27 日開始全面封城,禁止一切人車船隻進出。中共喺春節嘅時期做咁大動作絕對係迫不得已,唯一嘅解釋只係疫情已經全面失控,實行「棄車保帥」嘅策略。

廣告

被圍封城市瀕臨暴亂

被圍封嘅城市命運會點?用武漢做例子,入面患病嘅人越嚟越多,醫院設施爆滿,好多確診嘅患者喺外面自由走動,感染人數將會幾何級數倍升。宜家傳出武漢市有超過十萬人受感染,但係武漢市係一個一千萬人嘅大型城市,十萬人只係 1%,其餘個 99 % 喺封城後就變相喺市內等受感染、等死;醫療物資缺乏,要向外募捐;大量民眾死亡而屍體無得到妥善處理,將會引發另一波嘅疫情;接住落嚟日常物資、食物出現供應不足,物價飛漲,「燒搶打砸」隨時出現,大規模暴動只在眉睫。所以圍封武漢嘅命令唔係嚟自衞生組織「衞健委」,而係習近平以中央軍委主席嘅名義下達嘅軍令,圍城嘅係解放軍,就係為咗平亂而嚟。但係當嗰 99% 嘅人與其坐困愁城等死,當絕望籠罩之下人人「魚死網破」暴亂,屠城便有機會再現。

根據由十二月起由武漢通往外地嘅大數據人流,廣東省排名第一,所以汕頭成為湖北省外第一個封城嘅城市,代表嘅係汕頭市已經淪陷:封城係防止疫情再向外蔓延嘅措施,而唔係保護汕頭市民不受感染。廣東省將會係繼湖北第二個大型爆發嘅省份,汕頭市只係第一個,廣州、深圳呢啲大型城市,民工聚集、春節返鄉後會相繼淪陷,而同廣東省最密切往來嘅香港、澳門,將會成為接住落嚟嘅疫埠。用日期嚟推算,喺春節回鄉探親回流,大陸學生回港開學,香港喺二月尾有可能大規模爆發疫症,加上訊息混亂,大陸人防疫意識極低,而林奠到宜家仍然死不悔改,即使擁有比所有省市都要高嘅自治權力,去到呢個關頭仲要去信國務院乞求口罩,繼續大開中門,呢啲咁低能嘅決定,肯定唔係嚟自已經焦頭爛額嘅中央。

香港淪為疫埠幾成定局

香港嘅命運已經寫在牆上,由於林奠嘅終極媚上同對香港人嘅怨毒,喺關口不設防之下,肺炎肆虐只係時間問題。開始出現受感染嘅重症一定係大陸落嚟嘅患者,全港只有二十部 ECMO 機,一定會俾咗佢哋先,之後再有香港人被感染亦都無能為力;會達致飽和嘅除咗係 ECMO 機,仲有隔離病房,宜家未飽和已經出現屯門醫院被迫將感染病人置於無負壓設施的房間,達致飽和狀態只係時間問題。當社會有聲音要醫香港人優先嘅時候,林奠、陳健波呢啲無恥紅色政客就會高舉「人道主義」、「我哋都係一家人」呢理論企喺道德高地指斥香港人無恥,繼續道德綁架醫護去賣命救大陸人,置港人不顧。當中港矛盾去到頂點嘅時候,與抗爭運動嘅 momentum 合流成為新一輪抗爭原動力,就會由三萬個蒙面武器份子強力鎮壓,做番佢哋七個幾月嚟做慣咗嘅嘢,前景十分悲觀。

「人生何在逞英豪,天理人情只要公;天眼恢恢疏不漏,定然作福福來縱」。林奠繼續扮演馬謖逞英豪,香港人只能夠自求多福,做好自己嘅防疫工作,深信天網恢恢,疏而不漏,武漢肺炎或許就係天賜契機,讓香港人有機會「含笑斬馬謖」。

發表意見