立場新聞 Stand News

仲有 60 日考醫科畢業試 話你知執業試難唔難

2021/2/5 — 10:03

左圖由作者提供、右:林鄭月娥

左圖由作者提供、右:林鄭月娥

要做醫生,而唔醫死一個人,本身就唔係一件易事。考試黎講,你只需要答啱 60% 嘅問題,始終叫做可以低空飛過,合格。同學間有時講笑,「其實就算畢到業,我哋出嚟做嘢可以有40%係唔識架喎,LOL」

咁睇,好難咩?唔合理咩?要求太高咩?識得60%嘅嘢都做唔到,要求拆除門檻嘅人,又係咩水平?

我琴日先同師弟妹分享,醫科,絕對唔係要我哋乜都全部識哂,只係要識所謂嘅”Bread and butter”, “things you can't afford to miss”,做一個”reasonably safe”嘅醫生,呢啲都係教授係考試中展現出嚟嘅要求。

廣告

免試執業,就係連呢 bread and butter 嘅 60 %門檻,都唔再需要達到。

琴日上堂睇左六個症,有兩個中國人,咁啱一樣係喺深圳河以北,睇唔同醫院睇咗好幾年,遍尋良方不果,慕名黎到瑪麗醫院,先發現身上嘅癌症,原來遲咗幾年發現。又有太多例子,如病人係中國醫院,類固醇亂打一通,睇到我哋成組學生一頭霧水。

廣告

好多人同你講中國而家點進步,講就隨口噏都得,現實就係每日都無數中國人跨越深圳河落嚟,就係因為中國嘅醫療系統水準。身處其中就知,現實係呃唔到人。

關於免試執業,諗左好耐同大家分享咩。

我可以寫中國 VS 外國醫生合格率,可以講港英年代嘅英聯邦互認制度,可以講醫生其實不缺係公私營失衡,可以講政府一邊話唔夠醫生一邊凍薪本地醫護同撤回醫學院撥款。理據在我哋一邊,要講我打一萬字都講唔完。

但或者我只係想同大家分享下我嘅感受,一個仲有六十幾日就考執業試嘅本地醫科生嘅感受。

往年考最後畢業試前,會有一至兩個月放假 Study Break 比我哋溫習。今年,疫情之下,教學嚴重延期,教學節數大幅縮短,而Study Break,都縮短到得返十二日。十二日內,我哋要溫哂內、外、婦、兒、骨、精神、家庭醫學各科,再係一星期內每日考試考哂咁多科。而儘管我哋一班學生每日叫苦連天,我哋港大醫學院嘅教授,一早已經斬釘截鐵,講明畢業試嘅形式、難度、門檻、要求,完全唔會因而改變,”we have to uphold the standards of HKU MBBS graduates.”

儘管我哋呢班學生慘成受害者,我哋亦知冇得怨。

癌症唔會因為我哋上少咗堂,而對我哋嘅病人仁慈,我哋要識嘅、要做、要達到嘅水平,始終要做到。讀左六年,就知道要錯手害死一個病人,太易太易。你可以因為政治動機拆除醫生嚟香港執業嘅門檻,但你不能拆除醫生要係疾病手上救返病人嘅能力門檻。免試執業,贏咗一班暨南大學醫生返嚟,輸咗香港嘅醫療質素,輸咗香港人嘅健康性命,值得咩?

現時執業試試題嘅設定,難度其實訂於與我哋嘅本地學生考試相若,琴日走去做咗醫委會嘅樣本試題,我有信心我身邊嘅同學都可以有合格分數。考試內容中,固然有少少奇難雜症嘅題目,用於識別最好成績,攞 Distinction 嘅考生。但絕大部份,足夠比你合格嘅,都係常見病例、或者稍為冇咁常見但嚴重緊急,一定要識嘅嘢。

(有啲醫學知識,想知嘅,樣本試題啲 Topic如下:Endocarditis, adrenal insufficiency, pancreatitis for med; hernia, TURP for surg; colles fracture, hip AVN for ortho, cerebral palsy, wilms tumor for paed; stage of change, schizophrenia for psy; anti-D prophylaxis, fetal growth assessment for OG)

本地醫學院考生畢業率係超過九成五。

而執業試專業知識部份為例,英美澳等地考生考執業試,合格率亦約 41-61 %。中國考生?16%。

你覺得考試太難,都算,但連調整考試形式同難度都唔諗就話免試,再望下上面啲數字,就明點解林鄭政府要執意咁做。




最後,希望大家記得,香港仍然有一班本地醫護,努力去守護香港嘅醫療門檻,儘管有班人不斷想破壞呢個制度。為此,我亦係時候擱筆,溫書。


#免試執業 #後患無窮
#堅持把關 #絕不免試
#反對免試執業

#認同請share
#或者一人一Po

原刊於作者 facebook 

發表意見