立場新聞 Stand News

你有冇嘢想問香港七百萬人?

2019/10/25 — 20:09

作者製圖

作者製圖

1.

你有冇間唔中忽然有個諗法,然後好想知有幾多香港人同你一樣都係咁諗?

我成日都係咁。所以,我好鍾意睇民意調查,因為可以幫我哋回答好多問題。

廣告

你諗吓,過去幾個月,你聽過幾多次有人同你講:「唔好咁呀,再咁就民意逆轉㗎喇!」

如果冇民意調查,呢句說話到底係真定係假,就只得口同鼻拗。但係因為有民意調查,我哋知道香港人有 72% 唔信任警察,其中有 52% 俾零分;而且俾零分的比例係一個月比一個月高,六月頭的時候只得 7%。我哋又知道,有 69% 認為警察使用過份武力,而認為示威者使用過份武力的只有 41%。呢兩條數,三個月來都冇變過。支撐上面這些狀態的,是有 59% 的香港人認為當大型和平示威都未能令政府回應時,示威者有激烈行動係可以理解。

廣告

這一系列數據,將「民意逆轉」從一條簡單的是非題,深化成不同面向和不同處境的豐富討論,遠遠好過口同鼻拗。而且,我發現呢種深度對於向香港以外的人解釋香港在發生什麼事情,特別重要,因為有深度先至可以離開過份簡化的判斷。

講到對外解釋,之前一眾香港民間團體到美國遊說,爭取《香港人權及民主法》通過,被香港的一些政治人物批評冇資格代表香港人。看看民意調查:63% 香港人支持通過法案,反對的只有 28%。呢啲數據,為國際線提供了認授;批評他們的人,反而才是不能代表民意。

2.

呢個世界冇一個權力可以離開民意。呢個民意就算唔係清楚通過投票體現,最起碼也要通過啲人唔反抗而嚟。並冇任何一種武力,無論來自邊一個,係會足以令到所有人就犯。只有多數人願意服從,個社會先有可能運作得到。

當然,我唔係話民意大哂。民意唔等於真相。你返去中世紀做民意調查,啲人會同你講太陽圍住地球轉。不過,雖然民意唔等於真相,但係民意可以幫我哋理解大家點樣理解所處的社會,等我哋可以用最有效的方法來面對。

呢點,對於社會中處於弱勢的人,特別重要。當你本身已經處於弱勢,唔係有無限能量,唔係有無限子彈,咁你更加要一擊即中。如果有十個方法可以做同一件事,可以的話你一定揀成本效益最高的先。放響一個抗爭入面,唔係話民意支持就做,民意唔支持就唔做,條公式無咁直接;但最起碼,響可以選擇的情況下,當然選一個冇咁大麻煩的。例如假如你想提高政府的管治成本,你可以號召唔交稅,你亦可以走入公立醫院急症室打爛部 X 光機,甚至倒哂紅十字會啲血落海,三件事同樣會對政府帶來的麻煩,但後面兩種做法對運動帶來的反效果就會大到不能接受。所謂要諗民意,無非係呢個意思。

3.

問題係,點為之民意,有時唔係咁清楚容易知道。而要知道,要通過認真的民調機構做,又好貴。民調機構問的問題,又未必問得中你想知的方向。就算問得中,可能佢哋好耐好耐先問一次,回應唔到當下即時的需要。

學術少少咁講。民意係新聞,大家想知;邊個有權決定民調問乜同埋幾時問,就可以決定新聞題目,就可以決定個社會大眾討論乜嘢。所以,民調本身,都可以係一種權力。

而據說,香港正處於一場「冇大台」的運動當中。

既然咁樣,對於運動本身,甚至對整個香港本身的理解,又可唔可以去中心化,人人都可以參與,實行「自己民調自己問」呢?

如是者,我哋設計咗一個咁樣樣的開放式民意調查:每晚問五條問題,每條最少問三日。問夠三日之後,同一條繼續問落去定改問另一條問題,交由大家去決定。大家自己可以提出新嘅問題,如果大家覺得你提嘅問題比原有問題更值得問,就會取而代之。再過三日之後,大家就會知道結果。

就係咁,以後有乜爭議,唔洗再無止境咁主觀爭拗。攞上嚟,直接問吓七百萬人點睇。

有政治人物話好多街坊同佢講區議會選舉應該押後……好多街坊?即係幾多呀?攞上嚟問次先啦。

有政治人物話年輕人上街係因為買唔到樓……年輕人真係咁諗?攞上嚟問次先啦。

乜都好,講數據,唔好吹。問夠一千個香港人,用科學的手段回答問題。正常的民主社會有選舉,議員得到投票認授就代表大家。香港冇,唯有民調。

民調不能立即解決當前香港的困局,但可以提供一個共同的起點。

4.

呢個計劃,叫「我們香港人」,因為民調不單止問的對象是香港人,就連問題也是來自香港人。

我哋已經開始咗。想投票推問題的,可以去呢度

見唔到有你想問的問題,你可以去呢度自己加多條

如果你係非政府組織,歡迎你利用呢個平台。例如你搞環保,好想知有幾多人反對「明日大嶼」,咁你入條問題,然後號召網友幫你推上去,我哋幫你問。

就算你只係純粹好奇,例如想知道香港人鍾意邊隊英超球隊,覺得邊個曼聯領隊最唔掂等等,一樣歡迎你入條問題,然後號召網友幫你推上去,我哋一樣會幫你問。

最後,如果可以的話,呢件事其實要洗好多錢……如果你覺得重要,你覺得有價值的話,可以課金幫補一下

同埋鳴謝香港民研的鍾庭耀教授,肯陪我同大家一齊顛。

 

作者 Medium

發表意見