人在中環 - CK

人在中環 - CK

我係一隻又笨又固執嘅豺狼。著有《人在中年》。

2020/2/10 - 12:06

你說首批搶廁紙嘅人冇腦 那一直淡定不去搶,現在面臨用A4紙的人是什麼?

有件事我覺得都幾諷刺…

早兩日個friend笑班c9同阿叔去超市搶廁紙冇腦,今日佢喺個whatsapp group度寫:「屌,點解仲未有廁紙返貨㗎,我就快要用A4紙啦。」

Group裡面嘅另一個friend就串佢:「嗱,等你笑人冇腦吖嗱。家陣人哋可以開開心心去開大,你呢幾日就要用A4紙啦。」

廣告

咩叫聰明,咩叫冇腦?

第一批去搶廁紙嘅人,係因為誤信謠言話甚麼停產封關會搞到冇廁紙供應,佢地去搶,你話佢哋冇腦,合理。

但當有一批人走去搶廁紙,而謠言又冇辦法被有效停止的話,市面上嘅供應,就會好似依家咁冇晒。廁紙嘅supply長期當然冇問題,不過短期就必定受影響。假若你屋企嘅廁紙存量已經到達「臨界點」,而面對一個咁嘅形勢,依然淡淡定唔去搶返一卷半卷呢幾日用,最終搞到要用A4紙了事的話,咁其實係錯判形勢吧。笑人冇腦嘅代價,可能係shithole受罪。

當然吧,文明社會,應該有文明社會嘅人民質素。搶就大家都冇,唔搶就一切正常有序,呢個道理,邊個唔明?但係所謂文明嘅社會,仲有一個元素,係人民要有安全感至得。安全感來源自有效嘅制度、負責任嘅政府…當然仲有其他。觀乎香港現在嘅環境,其實仲有幾多條件去保持過往嘅文明?

有腦與否,有時都好視乎,你對你身處環境嘅判斷。一個城市文明人如果流落在荒野,你在城市裡習慣了的文明生活方式,恐怕也不會讓你活得長久一點的。

之前也寫過一兩次了。在現在這個政局、政權底下,香港人對於「生存能力」的概念,恐怕也要調節一下了。所謂生存,已經不再是說在工作環境、辦公室如何讓自己繼續有得撈有錢搵咁簡單,而是要讓自己能夠真正保住條命,唔好死去那種生存了。

經歷過口罩和廁紙之後,長遠一點去計劃的話,也許大家也值得想想,有那些「物資」是在非常時期特別需要的。想想這個list裡面有些甚麼,然後長期在家裡keep返些少stock以備不時之需。早點準備,日後爆鑊起嚟就唔使同人搶得咁辛苦了。

人類嘅歷史裡面,太平盛勢嘅日子其實唔係好多的。

作者 Facebook

(標題為編輯所擬)