立場新聞 Stand News

來自武漢的病毒就是「武漢肺炎」 名命口水戰被圍插 係中國攞嚟衰!

2020/3/18 — 9:56

來自武漢的病毒搞出的就是「武漢肺炎」。

不是「日本新型冠狀病毒」!誰說的?
不是「來自美國的病毒」!誰說的?
精確一點,也可以不說是「中國病毒」!
而是「武漢肺炎」。
或者就稱之為「新型冠狀病毒」我都唔抗拒。
但根據掌握到的資料,大家都清楚知道病毒的源頭確是來自武漢,搞出來的這個疫症就是「武漢肺炎」!

如果先不講嚴謹的學術名稱,這種以來源地名來標記某一種病毒或疾病的例子,可以說是俯拾皆是。好似從來冇留意到香港人投訴過「香港腳」係捏造;日耳曼民族不會因為有「德國麻疹」而認為是「種族歧視」;也記不得日本仔投訴過「日本腦炎」是要把大和民族「污名化」。強國政府這一次如此在意,究竟係想抹甩啲乜?這樣的反應,究竟反映了什麼問題?要賴落人哋度,又是什麼心態?這些大家心照算了!這樣的名命口水戰十分無謂,搞到俾人圍插,都係自己攞嚟衰!

廣告

侵侵用上「Chinese Virus」一語確實不妥!
但他也不是口快快或者貪口爽。

他這樣說:
“And rather than having an argument, I said I had to call it where it came from.”

廣告

如果發放假消息的不是什麼網上言論或者非官方媒體,而是一個國家的外交部,大家都冇嘢講,大家都唔批評,甚至有人信以為真,那侵侵用這種方式來回應雖然唔妥,但也都很難完全話佢錯晒了。

相對而言,日本仔真係算有涵養,起碼冇出嚟大吵大鬧,冇出嚟高調反擊,冇話中國駐日公使意圖把日本「污名化」,就等事實說明一切。有人說日本繼承了盛唐文化。果真如此,中土文明的偉大復興看來輪不到中國共產黨,也不會出現在中國大陸。中共冶下,最叻都只係倒退一百年多啲,去返義和團扶清滅洋嗰個水平!唔信?睇吓嗰啲千篇一律嘅大陸網上言論及所謂來自海外的消息,就知咩事!

外交部那些爛頭卒可能見到日本仔反應咁溫和,耿係覺得好爽,又堅以為自己真係好堅,食髓知味玩大啲,賴完日本仔之後就擴大戰線,公開話病毒來自美國。依家「武漢病毒」已經跨越國界傳到全世界百幾個國家,真係任佢揀。根據強國邏輯,話係「冰島病毒」又得,話係「北極企鵝病毒」都得!其實反正都經過反覆驗證,澳洲佬、加拿大人、或者瑞典仔比較好蝦,咪就是但揀一個賴落佢哋度囉!如果有抗議,就拉佢哋幾個公民,影埋片屈佢哋自己悔過認罪都得,睇吓仲夠唔夠膽出聲!但偏偏佢哋要揀美國,可能認為咁至有挑戰性!係要咁先至覺得爽啲堅啲!

當天侵侵答記者提問時只淡淡的說:”We all know where it comes from” 的時候,前面還有一句說他認為那那句「病毒是來自美國」的說法,不是「習近平的意思」。咁講都幾絕核,即係話「如果你外交部咁講,就不如請你個頂頭上司出嚟確認,若果唔係就當你造謠。」

既然仍然冇人出嚟就外交部的說法澄清,也避免繼續有argument,他的下一著就是 「 I had to call it where it came from」了。潛台詞就係既然你撩交打,佢就還拖,「如果唔同意,叫你個頂頭大佬出嚟講幾句!」

最高領導騎虎難下,當然不會公開否定自己外交部的說法,但看來也很難公開還擊。可能遲D跟侵侵通個電話,反正冇人知佢具體講乜,在隱蔽性較高的情況下澄清一下,將個責任推俾嗰個外交部發言人,變相承認自己的外交部官員講嘅嘢唔一定代表國家!

喺自己的子民及奴隸面前就話要永遠高大正確啫,對住美帝,低低地躀一舖又唔係未試過,慣啦!不過咁就好玩啦,以後外交部仲可以講乜!不過算啦,外交部的主要職責就是造謠,將「感恩黨」無限延伸去到意大利都夠膽,有咩做唔出?有咩講唔出?強國政府仲有幾多個部門有公信力?

流亡海外的作家馬健日前在英國衛報的文章中有這一句: “The Communist party is an insidious pathogen that has infected the Chinese people since 1949. “ 有一些長期「潛伏惡化的病源體」(insidious pathogen)確實遠比來自武漢的「新型冠狀病毒」可怕,也更值得大家防範厭惡。

最好笑係嗰啲建制派奴隸或者偽人,依家跳出來話侵侵「種族歧視」,點解中方外交官員話係「日本病毒」或者「美國病毒」嗰陣,佢哋又唔指斥係「種族歧視」?起碼應該公道一點,澄清一下是嗎?武漢肺炎疫情曝光之初,有上海人拒絕讓武漢人登上飛機一同回國,大鬧外國機場,丟人丟到全世界之外,又算唔算係歧視?係唔係上海人歧視武漢人就冇問題?點解當時啲奴隸議員或者偽人又唔出聲扮吓公道!

而家唔使「上海人帶頭歧視武漢人」,也唔使「中國人帶頭歧視中國人」,不同地方已經開始有更多反中國人及歧視黃皮膚的事件,侵侵這個說法,有火上添油的效果。香港人及在海外留學的香港學生,都很難避免成為被殃及的池魚。但有乜辦法?香港人先就俾北京不斷糟質,跟住就俾這個首先應該是代表香港人自己嘅政府迫害,依家可能就要面對世界各地嘅反華及歧視黃皮膚行為波及!咁嘅環境,怪不得越來越多後生仔話要港獨!

老實講,我哋呢啲當年曾經相信過一國兩制港人治港的,也只能佩服今天嘅世界已經不復像當年般天真!值得慶幸的是雖然冇得揀,首先就是「被強國人」,但香港人預防病毒及抗拒「潛伏惡化的病源體」的能力遠比「強國人」強!也只能慨嘆所謂改革開放了四十多年,今天這個強國更加難以令任何人有幻想!

作者 Facebook

(標題為編輯所擬)

發表意見