立場新聞 Stand News

全民檢測有無用,其實係流行病學 101

2020/8/26 — 14:24

陳肇始、林鄭月娥

陳肇始、林鄭月娥

全民檢測有無用呢個問題,其實係流行病學 101 嘅課題。

呢個世界除咗武漢肺炎,仲有好多好多病都會死人,但係基本上無任何一隻病會做全民檢測。

大腸癌、肺癌、乳癌、愛滋病、糖尿病、心臟病,每種病都有佢哋嘅 screening test,每種病都可以致命,咁點解唔全部做全民檢測?錢香港大把,何況做 100 個檢測嘅錢同資源一定少過醫一個大腸癌嘅病人;所以唔做唔係因為錢嘅問題,係因為無用。

廣告

每一個 screening test 都有假陰性 false negative(即係明明有病 test 咗你無病),或者假陽性 false positive(即係明明無病但係 test 話你有病,嚇餐飽),呢啲錯誤喺全民檢測嘅情況下大大增加。就算個 test 敏感度同準確度高到 99%,淨番嗰 1% 嘅 false negative / false positive rate 喺個檢測基數變成全港 750 萬人,假陰 / 陽性嘅問題就會以幾何級數倍大。

所以所有專家都會反對全民檢測,只會將 screening test 放喺高風險群組,個病嘅 prevalence(普及率)高嘅時候,做 screening 先至有意思。放番喺上述病嘅例子,即係家族有 cancer、有食煙、男士 40 歲後、女士有近親有乳癌、有不安全性行為等等嘅情況下先至會做檢測,否則只會勞民傷財,構成不必要嘅恐慌或者製造虛假嘅安全感。再講,某啲嘅檢測帶有入侵性,白做一番之餘仲有機會有風險,測不到之餘仲會賠了夫人又折兵。

廣告

香港而家武漢肺炎嘅情況:

  1. 大陸測試劑嘅準確度及敏感度均成疑。
  2. 香港現時患武漢肺炎嘅人數極低,實際確診數字極少。
  3. 採樣做檢測嘅過程正正係最高風險嘅環境。
  4. 急就章以高薪招聘嘅醫學生、物理治療師、AO 等工作人員嘅訓練足夠與存疑。
  5. 檢測後並無全面切斷傳播鏈嘅相應措施,上晝測完,下晝可以染病。

基於以上幾點,一個正常嘅醫生、專家喺無任何政治考慮下都會反對對全民進行無任何科學根據嘅檢測。既然無科學根據,港府都要硬推上馬,「DNA 送中」嘅陰謀論先會廣泛流傳,不逕而走,因為除咗背後有更大嘅原因,根本解釋唔到違反科學嘅決定。

流行病學 101 咁簡單嘅概念,唔好講林鄭身邊嗰啲專家小組,連普通一個醫學生讀咗幾年書都識,唔好唔記得現任食衞局局長陳肇始教授,(雖然佢廢),但係佢都貴為美國哈佛大學公共衞生碩士、英國皇家內科醫學院公共衞生學院頒授榮譽院士,呢啲根本就係佢嘅本行,無可能唔知全民檢測嘅問題所在,係咪以政治埋沒專業,自己判斷。

科學理論喺林鄭口中就變成「所謂嘅專家同醫生」不懷好意,抹黑中央嘅政治考慮。許樹昌、梁卓偉、袁國勇都同屬此流。香港由上而下瀰漫住一種反智、反社會、反科學、反邏輯嘅思維,凡事只講路線,不論是非,同當年嘅文化大革命越嚟越近。

 

(標題為編輯所擬)

發表意見