立場新聞 Stand News

加裝分體冷氣破壞歷史氛圍 百年車卡價值慘遭侮辱

2021/4/11 — 18:41

圖片素材來源:大埔交通 Transport in Tai Po facebook

圖片素材來源:大埔交通 Transport in Tai Po facebook

【文:大埔交通 Transport in Tai Po】

仲記唔記得上年 5 月一架百年歷史火車卡 313 號大鑼大鼓運入鐵路博物館嘅情境?康文署耗費 600 萬港元同一年光陰,令閒置荒野多年嘅車卡回復昔日光彩,被譽為「香港史上最大型陸路文物運送項目」。車卡到達博物館後,受「執漏工程」同武肺疫情雙重影響,一直都未有開放車廂,直到 4 月 2 日博物館重開之後,終於能夠登上 313 火車卡參觀喇!

然而一登上車廂,會發現⋯⋯點解咁涼爽嘅?原來呢卡今年踏入 100 歲嘅火車卡,車內居然加裝咗一排分體式冷氣機,同時發現所有車窗都加裝咗現代化嘅掛簾,天花板原本嘅風扇位就變成喇叭(但估計原有風扇早在茶果嶺時期已拆去)。最離譜嘅係,車頭位置更因為需要加裝電視櫃,強行將幾行座椅拆走,一架百年歷史火車卡,就變成冷氣充足嘅「放映廳」。

廣告

或者你可能覺得,歷史文物活化,少不免會加設現代化嘅設施,正所謂「與時並進」,但其實並唔係所有物品都適合現代化,並且需要保留一定的原汁原味,先可以從歷史物品中去學習。如果要加設一些現代設施,相信亦有更妥當而不損文物原真性(authenticity)的做法。康文署一方面對外宣傳 313 車卡嘅復修過程點樣一絲不苟,另一方面又唔尊重復修團隊嘅心血,實在不禁令人搖頭嘆息。事實上,保育 313 號車卡屬於「更新香港鐵路博物館的常設展覽」撥款嘅其中一環,旨在提供「更豐富嘅體驗,令詮釋展品的方法與時並進,妥善保存香港的文化遺產」,但 313 落得如此下場,恕我哋並唔認同呢筆公帑係用得其所。

短短 15 分鐘時間逗留,埔交嘅小編觀察到參觀人士嘅反應:有唔止一對家長帶同子女登上火車時,向子女講解「以前嘅火車係唔應該有冷氣嘅」,甚至嚟影打卡相嘅人,都要絞盡腦汁諗點樣防止嗰排冷氣機入鏡。即使唔係鐵路迷或者歷史研究者,都感覺到館方咁做有咩問題,可想而知歷史物品保留原真性係何其重要。

廣告

大埔交通聯同 香港鐵路發展研究組 HKRDG火車未到站 Train Not Arriving 滄海遺珠 Alternative HK 一眾長期推動香港鐵路歷史傳承與文物保育嘅專頁同組織,對於康文署喺 313 號歷史車卡上加裝現代化設施一事表達深切關注。縱使我哋理解館方因空間長期不足,需要善用歷史車廂作唔同嘅用途,可能需要因此加裝現代化設施,但一切加裝嘅行為都應該符合文物保育嘅「最小干預原則」,確保唔會令文物失真。

現時 313 車卡嘅境況實在令人失望,我哋希望館方盡快恢復車廂原貌,如果有需要利用歷史車卡設置放映室等設施,亦應另覓更配合百年車卡文物價值嘅手法同設備。鐵路博物館空間不足長期為人詬病,長遠而言,香港更應設立能彰顯香港交通運輸發展史獨特地位嘅全新博物館,妥善收納交通文物同古典車輛。


#大埔墟 #九廣鐵路 #KCR313 #香港鐵路博物館 #鐵博 #港式保育 #假保育 #究竟棄置曠野20年侮辱啲定當佢係貨櫃屋侮辱啲 (AdminEH)

原刊於大埔交通 Transport in Tai Po facebook 專頁

發表意見