立場新聞 Stand News

口罩點蒸至好味?

2020/3/2 — 10:14

作為建制派議員,蔣元秋算有創意㗎,政府防疫防到坺嘢咁,要轉移公眾視線㗎嘛,淨係捐人工唔夠嘅,明眼人都知妳左手交右手啦,呢頭從抗疫基金中撈一大筆,嗰頭拎番啲出嚟,就可以呃選民話自己做實事,肯犧牲,總有人上當嘅,抵到爛啦。咁睇穿妳籠嘢啲人呢,妳就幫手製造話題,連蒸口罩都畀妳諗到,引佢哋把注意力集中在妳身上,掛住笑妳,就無咁在意口罩荒係邊個一手造成。妳算唔話得啦,扮小丑扮到咁盡,建制派應該撐妳先係,做乜唔睇妳台戲,要妳部署個人出選呢?

其實妳力推蒸口罩,仲引用專家做嘅實驗證明無介紹錯,反駁批評妳嘅人,呢個係建制派來講,係行前咗一小步㗎。通常建制派反駁人家嘅批評,都係自說自話,我話係就係嘅啫。妳唔同吖,妳嘗試本著少少嘅科學精神去求真啊,雖然被人踢爆妳無交代清楚妳蒸嘅口罩有無使用過,蒸完之後啲病毒和細菌又無講剩番幾多。以妳的智力來講,算係咁啦,唔應該苛求嘅。

另外有一個做得唔夠好嘅地方,妳無講到點樣蒸口罩至夠和味,究竟清蒸再用豉油熟油加啲葱絲薑絲淋上面,抑或用豆豉、麵豉齊水蒸就夠呢?又駛唔駛就地取材,用當造嘅本地食材蒸至夠鮮味?咁要用 CSI 出品噃,都話本土農業有市場㗎啦,你睇幾多 CSI 口罩流出市面周圍賣就知,香港人是識食㗎!

廣告

 

作者 Facebook

廣告

發表意見