立場新聞 Stand News

同為香港人,但就有唔同命運

2020/7/20 — 16:32

作者提供

作者提供

【文:local9up】

繼續北區系列,其實依次係因第一次有網友inbox我哋,話想知道多啲馬屎埔嘅嘢,咁就一於寫吓啦。

其實馬屎埔既歷史好似無咩詳細資料。主要都係講述戰後南海、番禺同順德嘅居民南來香港,成為馬屎埔非原居民,村民就一直都以農為業,馬屎埔村到依家已經有60幾年歷史。至於個名來源有傳係來自於以前嗰度係英軍牧場草場,令馬屎佈滿地面,後尾曾一度將馬屎改做馬仕,字面上好聽啲好睇啲咁解。而「埔」係指位於河邊沙洲同水有關係嘅地方,馬屎埔附近就有條梧桐河。正如同大埔、黃埔情形類似。

廣告

依幾年馬屎埔村就因新界東北發展而發生一連串嘅收地衝突。只要係Google打馬屎埔三個字都有一大堆關於依啲新聞,所以係度就唔詳細講喇。不過,當將幾件新界收地爭議嘅事放埋一齊黎睇,自然會有種政府欺侮小市民嘅感覺。

作者提供

作者提供

廣告

首先,近排橫洲三條非原居民村已經到咗收地限期,亦即話三條村即將清拆,村民一直以黎成長嘅屋企將被毀。而同為非原居民村嘅馬屎埔依一兩年嘅收地衝突,相對黎講就静咗,但仍然面對村被滅嘅威脅。兩個地方都同樣面對政府忽然收地,好多村民突然被通知短時間內要搬走,政府似乎唔理非原居民嘅意願。就算當爆發收地衝突,政府/地產商展開咨詢,都只係一個形式,即係「意見接受態度照舊」,所以當睇住依兩個地方,你只會感受到政府嘅無情。

不過政府只係對小市民無情,對於地產商/原居民就傾向接受佢哋意見。例如就算係回歸前,政府想發展象鼻山公路,卻收到12份鄧氏原居民反對,話會影響祖墳。雖然最後都興建咗公路,但卻有為反對嘅居民提出計劃修改,而且政府因工程施工會向受影響人士賠足躉符費。要記住當時只係得12份反對書就足以令政府聽到佢哋嘅聲音,而相比2016年橫洲情況,就有好大對比,當時政府已經收到160份書反對建新路,卻換來政府突襲入村,更走入村民睡房逼遷,而嗰陣嘅689更表明唔會有任何修改計劃。而且,橫洲嘅摸底更加令人相信政府只傾向聽鄉紳/地產商意見,當時政府以摸底形式只咨詢部分嘅地區人士後,最後令原來打算興建17000公屋單位縮成得4000個,更令人懷疑計劃有偏向鄰近地皮擁有者新世界集團。咁一直都反對發展計劃嘅橫洲村民意見去咗邊?

作者提供

作者提供

而粉嶺高爾夫球場亦同一道理。嗰度被譽為「富豪樂園」,一般小市民唔會享用到。如果將高爾夫球場170公頃嘅大部份地方劃為新界東北發展計劃嘅話,政府就可以大大減少依家受影響嘅地方賠償同拆村問題,即係馬屎埔村依家面對緊嘅威脅。不過政府就似乎睇唔到受影響嘅小市民,卻接受將170公頃地發展縮少為32公頃。亦即話,有錢佬可以繼續揮桿打高爾夫球,不過喺佢咃揮桿一刻,馬屎埔村村民就面對推土地輾平村民一直以來成長嘅家。

作者提供

作者提供

其實橫洲、馬屎埔村嘅社區生態間接令政府無視佢哋嘅意見。因為非原居民村嘅農民家庭,一般都係首先搞掂自己嘅生活為最重要,而同鄰里嘅關係只係排第二,所以好少會有原居民五大家族嘅祭祀廟會等聯誼活動,而且非原居民亦一直未有建立血緣同地緣嘅宗祠組織,佢哋可以話只係小農民,個體經濟戶。而且佢哋嘅耕地面積小,一般離自己屋企唔遠,同大地主唔同,亦即可以用四個字形容非原居民「無財無勢」。因此當政府收地時面對各方利益爭議時,一係選擇面對非原居民嘅無組織無財勢反抗,一係面對影響力深遠嘅原居民或地產商對抗,咁…政府自然識得點做啦。但其實非原居民同樣都係香港市民,同樣都有為香港作出貢獻,只係香港畸形社會結構而令佢哋直接面對社會不公。

(作者簡介:係Facebook 開設Local_9up專頁,個page係想介紹下喺我地生活既地方 ─ 香港。因為有好多一直係我地身邊無乜留意既事,都有特別既故事係入邊,希望等多啲人了解多啲香港,留住香港。Speak my mind, 9up is our life.)

發表意見