立場新聞 Stand News

告別巴士每平方米企六個的瘋狂時代

2020/6/15 — 15:09

立場新聞圖片

立場新聞圖片

【文:交通專頁聯盟「環島一家」 】

大家有冇發覺依家越黎越多巴士線都會逼爆頂閘?搭巴士都係好似搭鐵咁做沙甸魚呢?

其實一直以黎運輸署對增加巴士服務嘅條件都非常嚴苛,同時間減班條件又非常寬鬆。運輸署要求巴士線最繁忙半小時載客量達 100% 方可考慮加班,但低過 85% 就要減班,當然係加難減易啦!企位計法亦一直以不切實際嘅一平方米企六個人計算,巴士逼爆頂閘未解決,就緊係繼續和你逼啦!

廣告

運輸署最近終於踏出左第一步,修訂左《巴士路線發展計劃中有關改善及減少服務的指引》,放寬增加巴士服務嘅條件。署方一方面將企位計法由一平方米企六個人降至四個人,另一方面加班需達到嘅條件放寬左,減班條件就收緊左。巴士服務唔再需要 100% 先可以加班,最繁忙半小時載客量達 90% 就可以考慮;減班呢?最繁忙半小時載客量低過 75% 先可以。巴士公司會因應指引改變增購 50 架車,指引將會由下年年中起開始執行。

「環島一家」歡迎運輸署行出第一步去改善巴士服務水平,但我地必須強調,「只係第一步」,要真正改善巴士服務,係仲有好多問題需要處理!

廣告

一:缺乏開放數據,社會難以討論

即使運輸署改善了指引,但現時香港交通數據極不開放,客量數據嘅調查日期、時段、位置、方向等統統唔公開,市民根本難以確定客量數據嘅準確性,亦欠缺數據提出改善巴士路線服務嘅方案。

二:新指引應盡快生效

新指引能稍微改善市民出行,運輸署應於明年的巴士路線計劃以至屯馬綫路面交通重組都應該採用,而非等到 2021 年中先生效。

三:增加巴士數目明顯不足

專營巴士車輛數目自主權移交起只有些微增長,遠遠追唔上不斷膨脹嘅人口及隨之而來嘅龐大通勤需求。今次修訂幅度唔細,相信會有多條巴士路線可以按新指引增加班次,但署方只係計劃為全港增加 50 架車,顯然唔夠。

「環島一家」認為,現時巴士服務水平實在有待改善,運輸署喺巴士服務班次更動上仍有好多工作須要做好。同時間,巴士服務質素亦受好多其他因素,包括私家車數量暴升以及路線規劃所影響,運輸署亦必須正視此等問題,方能真正為市民提供方便、快捷而有效嘅公共交通服務。


(作者簡介:「環島一家」由五個地區交通 Facebook 專頁所組成,旨在推動地區人士合作溝通,改善香港交通問題,促進香港交通可持續發展,提升市民生活質素。紅土交通灣仔交通東區交通西區交通南區交通

 

發表意見