立場新聞 Stand News

咁就一年,我發現,我真係好 L 鍾意香港!

2020/8/31 — 13:22

約一年前,市民幾乎每日都面對催淚彈「放題」。(立場新聞資料相)

約一年前,市民幾乎每日都面對催淚彈「放題」。(立場新聞資料相)

舊年今日之前,我識得好多朋友,從6月開始,每逢禮拜六日,大家嘅活動就只係行街,唱歌同埋中TG。雖然平日要番工,收工去食彈真係令人感到好攰,但係大家依然會不斷係咁行出去。行咗出去,雖然令自己更加更加攰,不過心裡面感到嘅安樂,又完全可以克服身體上嘅問題。所以,逢禮拜五收工開始,大家就會上身準備好,放低打工嘅心態,行出街會大家做啲嘢,又差一差電。

記得嗰陣時,黑暴成日借啲意就封路,又呢又路,好多人都會走去坐港鐵。因為佢有人情味,佢會因應情況調整服務,佢令大家覺得佢係同大家同行嘅。結果,每逢禮拜六日,喺一啲大轉車站,等轉車嘅人,比平時番工放工唔知多幾多人,總之就係好多好多黑色嘅人啦!

去到番歸嘅時候,喺票機度會有一大堆散紙,又有一大堆單程飛,總之點都會番到屋企。大家又怕行完街成身大汗,所以又會帶定一大堆衫,總之大家都能夠乾乾淨淨好安全咁番到屋企。

廣告

本來一切都好好,大家都非常支持港鐵,大家都突然包容到佢成日壞車,又成日加價嗰啲老土嘢。大家一齊頂住,都無謂咁多計較啦!就算去到7.21咁大鑊,大家都無將個茅頭指向港鐵。始終,所有嘢都係因為有最少39分鐘,只係見到好多白衫,但只搵到兩件快閃黑暴。你港鐵唔開車,某程度上都仲可以理解,雖然,大家心入面都唔好過。

對好多人嚟講,由細到大港鐵都佔據住一個超重要嘅部分。總之入閘出閘「啫」一下,巴士小巴基本上完全唔識搭。直至去到舊年今日,突然成單嘢完全變咗完全唔一樣。幾十歲人,明明住黨鐵站上面,有時間預,唔使出汗點到點就去到嘅地方,佢哋竟然唔怕塞車唔怕身水身汗,袋住一大堆散紙去迫巴士,一唔係就蕩失路,一唔係就遲大到。

廣告

成件事,真係戇居到無朋友!不過無計,條氣唔順啊!唔順到唔單止唔坐黨鐵啊!明明由十零歲袋到而家張八達通,上面有自己細細個傻豬豬咁樣,但都的起心肝去當咗張卡,決心要同佢一刀兩斷。一年之間,明明依然仲住喺同一個地方。但係成個生活模式習慣所有嘢從此都唔再一樣。

當然,之後仲有中大理大,仲有區議會選舉,仲有積極不干預武肺,之後之後仲會有好多嘢要發生。不過,呢啲都無咁重要喇。下半世人,是藍是黃,去到舊年今日,都已經翻唔到轉頭。去到舊年今日,如果你仲係覺得唔關我事,總之就要喺度舔到盡,之後就拍拍籮柚散水走人嘅......算啦,道不同不相為謀。

去到而家,有權嘅無權嘅,好似就只有一樣嘢達成共識,「攬炒」,加速「攬炒」。可以預期,就算明年今日,都會同今日完全唔同。如果每個神話破滅,青姐都要流馬尿嘅話,我相信,之後搵定個浴缸畀佢都得啦,因為到時肯肯定唔會止一殻眼淚咁少。作為新一代嘅香港人,既然呢一年大家心態都唔同咗,需要又唔同咗,以前嘅香港就算唔會再存在,傷心或者唔捨得,一定有啲嘅。不過,無辦法啦,為咗收成,為咗賺錢,有班人呢十零年一味落化肥,甚至種鴉片,呢度死唔晒算好叻㗎啦!

無端端咁就過咗一年,大家都翻唔到轉頭,大家都焗住坐呢架無限加速嘅子彈火車,大家都唔知呢度聽日變成點。不過,唔緊要啦!大家一齊頂住,大家一條心,去到咩環境,都仲係可以好好開花結果嘅!

我真係好L鍾意香港!我哋都真係好L鍾意香港!

雖然已經唔再住喺呢度,不過身為曾經人鍊上的一環,我依然感到非常自豪!

雖然已經唔再住喺呢度,不過身為曾經人鍊上的一環,我依然感到非常自豪!

發表意見