立場新聞 Stand News

【唉冷靜少少好無】如何理性抗疫?

2020/2/7 — 10:06

市民排隊買口罩

市民排隊買口罩

口罩荒繼續發酵,林鄭當然不能開脫開來。但見大家瘋搶口罩,而家仲要搶埋糧食,我想講大家都是時候要更理性抗疫。我觀察到有幾點:

第一,有關口罩問題,我覺得大家有種感覺,「有口罩就有生命有曙光!」,我想講呢個是一個錯誤想法。有口罩唔係大哂。早前我都講過,唔係你「有無個口罩」、而是你「有無戴啱個口罩」。你買買買、但又戴到錯哂、更加浪費。而家出街,10 個有 2-3 人仍然用緊錯的戴口罩方法。已有研究顯示,我們戴口罩時間越長,會錯誤以為自己「有做防護措施」、就更難遵守正確戴口罩方法。如果戴錯口罩,你同樣有感染風險;起口罩荒之時,大家更加要好好珍惜自己手上口罩。咁有閒情出街排隊搶口罩嘢食,不如節省少少留喺屋企節省個口罩仲好。

我明不少人面對口罩短缺是好驚。但記住戴口罩外,勤洗手同埋有.意.識.避開他人飛沫/分泌物也十分重要,唔做呢啲嘢等於無用;咁樣通宵排隊搶嘢法,又凍又盛、又多人聚集、癡哂人地啲病菌、唔病都變病。寧願屋企大掃除,做好個人衛生,經常抹電話/keyboard/mouse,出街最好唔好掂任何扶手/按鈕—除非有邊個 PK 專登喺你面前打個大乞嚏,否則如果做好上述工作,惹到機會率已經低好多。講真,我寧願節省住用口罩,都唔會買幾百蚊甚至千蚊一盒口罩。外科口罩不能重用,但也有一些節衷方法,例如跟下 K. Kwong 教路以延長口罩壽命、睇多啲新聞、學下在不得已之下如何重用口罩 — 當然這不算理想,但也是節衷方法,總比蒸口罩 make sense 吧?

廣告

第二,有關可重用口罩問題,我發覺有不少人對於可重用口罩頗抗拒。但試想想,一人一日幾個口罩,真是長久之法嗎?我想強調一點,暫時種種跡象顯示病毒由飛沫傳播而非空氣傳播,所以能抵擋飛沫級別的口罩足具阻抗力 — 如果空氣都傳播得到,應該唔止呢個爆發數字。購買可重用口罩才是可行的永續方案,只要處理得當,某些可重用口罩規格亦及得上外科口罩 — 仲要講緊個疫症「唔知幾時完」的情況下,難道真的過一頭半個月就同人搶一次口罩?!為口罩而生活的生活,仲係咪生活?!

都是嗰句,尋常百姓只出街搭車買餸,唔無啦啦出入醫院重地,中招機會理應比起醫院前線低得多,防護規格亦不用去到醫療 N95 程度;全球口罩荒下,N95 都是留番俾更需要的醫護前線啦。但當然,大家亦應使用世衛建議的口罩規格,你唔好同我講戴個普通布口罩或者抗爭口罩就算。

廣告

第三,經過 SARS 一役,仲信謠言?仲信封關 = 封貨?如果你真係信,不但唔理性、更加智力有問題(sorry 我 harsh 咗但真是咁諗……)。入境管人、海關管貨,封人入唔等於封貨 OK?而香港入口來源也不止大陸仲有其他地方。自己要足夠就可,買一大堆貨放在家,佔位封塵污糟不特止,真係世界末日的話,俾你用多一年半載又點?個政府癲啫、大家唔好同佢一齊癲好嗎?個政府瘋狂,大家無必要同佢一齊瘋狂㗎?世界上有好多壞人故意製造謠言,唯恐天下不亂 OK?

最後,真係要套用某藍絲專頁嗰句,唔該「冷靜分析、理性思考」,喺人心惶惶的時刻,更加需要大家冷靜,理性抗疫唔該。

發表意見