資料圖片,來源:Ivan Diaz @ Unsplash

唔難發現好多人都係 hypocritical

平時大大聲聲去話我有自由,我有選擇嘅權利,我鍾意點就點。

大部分情況下係無錯,但你生活緊喺一個社會裡面,就自然有社會責任。你住荒島嘅話 really no one gives much shits。如果你要 make your own informed decision 其實真係無問題,你要唔打疫苗你要暴露自己喺感染後重症嘅風險,呢個係你嘅選擇。但當你去叫人唔好打疫苗嘅時候,就係一個 counsel,你就要負責任。

正如駕駛期間要戴安全帶,基本上你唔戴安全都真係唔會影響其他人,死嘅都真係得你一個。但你周圍同人講話,我聽講戴安全帶 / 新聞話戴安全帶有機會夾住條頸,又有機會撞車時壓傷個脾臟至內出血,好危險呀。

然後周圍同人講叫人唔好戴安全帶。

但你無同人講過唔戴安全帶嘅風險,撞車時飛出車外嘅創傷同死亡嘅機會。你乜都無講,你只係自己不斷散播戴安全帶嘅危險,之後叫人唔好戴安全帶。

好啦,到真係有人聽完你講無戴安全帶,之後撞車飛出車外,送去ICU搞咗幾個月,最後不幸死亡,呢班人會唔會負責 ?唔會,會唔會有政府保險賠償 ?唔會,連你買嘅車保都唔會包你,因為你 willfully made this decision。醫生建議病人打疫苗時係會同你分析打嘅風險同唔打嘅風險,政府推疫症時會有保障基金去 cover exceedingly rare 嘅副作用。但叫你唔打疫苗嘅人呢 ?除咗陰謀論同亂咁計數外,係乜都無。

好啦,你話要自由嘛,要唔要取消規定駕駛時要戴安全帶 ?要唔要取消規定地盤工人要戴安全帽同安全帶 ?要唔要取消規定飛機起飛降落時要戴安全帶,我可以舉多幾百個現有例子,今時今日即使係歐美加澳等自由民主嘅大國都有嘅「限制自由」嘅措施。

呢啲限制唔係為咗限制自由去訂立,而係要確保可以避免嘅傷亡盡量避免,而社會資源得以盡量公平咁分配。

好多網絡上講得好大聲,周圍鬧爆醫護鼓勵市民接種疫苗嘅人,大多係從來唔係前線醫護或前線工作人員。

佢地唔係每日要係 COVID 病房/ICU 同病人解釋病情,打電話俾家屬同佢講,病人狀況唔係咁好,可能要插喉、可能過唔到呢關、幫病人錄短片同家屬交帶身後事。更甚嘅係同病人講,對唔住,我地未有 ICU 床位或呼吸機,要排隊等候。

佢地亦唔係 non urgent service provider 嘅醫護,唔係每日要同病人講,唔好意思,醫院無人手去幫你割發炎嘅膽,你忍住痛先,我地俾止痛藥你。唔好意思,醫院無人手去幫中風嘅婆婆做康復治療,你地係屋企要盡量1:1照顧,佢吞嚥、講嘢、行動都會不便。唔好意思,下刪幾百個每日要 delay 嘅 routine non urgent 但對生活質素好有重大改善嘅醫療服務。

無,佢地無諗過,因為從來都無落手落腳做過,無諗過任由疫情爆發嘅後果係乜嘢。

香港做得好好,成功咁隔絕咗病毒嘅入侵,但百密總會有一疏,總有開關嘅一日。現時無事允許我地有呢個 luxury 去考慮打或唔打,呢個係你嘅 informed decision 但當你要去叫人唔好打嘅時間,唔該你做返個負責任小小嘅人。

Ignorance kills 

***********

重申多次,個人選擇沒有絕對嘅對定錯,你選擇唔打針,因為:

- 懷孕期間擔心,唔想有罕有風險;

- 餵母乳期間擔心,即使目前研究顯示安全,但唔想有影響BB嘅潛在可能性;

- 身體健康因素,想資訊更多專家意見;

- 想睇定啲先;

- 其他種種原因;

其實真係無問題,自己 make informed decision;

但玩弄數據、散播偽科學去、陰謀論等等去叫人唔好打,係非常不負責任嘅做法。

 

標題為作者所擬;作者 facebook

編輯推介

    發表意見