2017/8/30 - 14:05

嘉頓麵包廠或成歷史　畫家組團為時代存照

集工廠、餐廳、展館於一身的深水埗地標，嘉頓麵包廠或遭拆卸重建為商廈。「畫吓嘢」的一眾畫家，暨同保育達人「原人」，一起開辦導賞團，並即場寫生留念。

＊　＊　＊

原人（右下角陪老婆者）

問：為什麼要發起聯署，呼籲保存嘉頓麵包廠？

原人：麵包廠除左代表嘉頓公司，亦代表到香港飲食文化嘅演變。

朱彬係著名建築師，現代主義嘅建築喺香港愈嚟愈少。從前深水埗喺海邊，所以麵包廠上有鐘樓，亦係當地地標。當年深水埗都係寮屋，徙置居，麵包廠象徵現代文明帶來重大轉變。

佢見證左好多歷史，包括二戰時生產大量軍用麵包餅乾，之後嘅雙十暴動、六七暴動等等。

發展商話要保存烘焙文化，但就想將 1932 年落成，1958 年擴建嘅建築，改建成 25 層樓嘅商廈。真係想保存文化，應該保留建築。

雖然麵包廠係私人產業，亦冇古蹟評級，但政府需要介入，同業主和社區傾一個方案，既保留到建築，亦保障到業主權益。

我地將會寫一啲報告畀古諮會，希望為麵包廠申請到古蹟評級。雖然一級歷史建築都可以拆，但起碼有多啲空間，討論原址換地等唔同方案。

＊　＊　＊

問：討論中環郵政總局、嘉頓麵包廠的去留時，都會聽到一種聲音－－幢建築四四方方，都唔係好靚，留嚟做咩？

原人：朱彬係第一代留洋建築師，好多上海、香港嘅著名建築都出自他手。五十年代全世界都流行現代主義建築－－美感為用途服務，講究實用。同年代嘅政府山、麵包廠、石硤尾邨都係典型。麵包廠正正係當年帶領潮流嘅開端。

睇建築唔剩止睇表面，仲見到背後嘅時代精神。香港慢慢由漁村變成轉口港，由轉口港慢慢走向工業化，實而不華嘅現代主義建築，正正代表香港起飛嘅故事。

＊　＊　＊

Willie

「由細到大都係食嘉頓啲包，聽到話要拆，都想參加吓。」

＊　＊　＊

張先生

張先生是建築師，也兼善繪畫。「我地一班朋友一直都搞寫生活動，自己亦住過堔水埗。我好欣賞依幢建築，真係冇得頂，同大會堂一樣。」

不過他認為要平衡發展和保育。「嘉頓麵包廠見證左一代歷史，但歷史要向前行，佢嘅記載會留低，唔一定係建築留低。地係值錢嘅，如果能夠令社會向前，地標可以結合新嘅發展。不遷不拆我未必同意，可以揀中間路線。」

＊　＊　＊

好幾位畫家都在堔水埗周遭長大。

「由細到大住開依區，都見住依幢大廈，既然有導賞，就特登過嚟聽。」

「細個爸爸媽媽帶我到公園玩，玩完都會帶我嘉頓買嘢食，對依度好有感情。」

「我知道嘉頓廠有歷史，但聽過導賞先知咁悠久，更加覺得依個地方值得保留。」

＊　＊　＊

後記

祝天下有情人終成眷屬；咒天下無情人繼續木獨。