立場新聞 Stand News

回應袁國勇教授指少量樣本無法於檢測人類基因 即等於交水喉水之言論

2020/12/28 — 13:14

資料圖片:袁國勇

資料圖片:袁國勇

【文: 腦博士 Dr. Brain】

尋日瘋傳一段袁教授於《講清講楚》的訪問內容,提及「有 3% 的樣本沒有人類 DNA,即係佢畀啲水喉水我哋驗」,立即引來恐慌,擔心有關當局把巿民的 DNA 送去作基因圖譜分析(whole genome sequencing)等猜測,又話「如果冇做基因圖譜分析又點知入面冇人類基因」。咁究竟大家猜測係咪正確,政府係咪一定要做基因圖譜分析先知入面有冇人類基因?

先利申,小弟並非註冊化驗師,只係做咗差唔多十年研究,期間有做過大量 RT-PCR(測試武漢肺炎主要係用 RT-PCR),都叫做熟悉呢項技術咁啦。

廣告

RT-PCR 先將人類的 RNA 轉錄成 cDNA,再透過 PCR 去將感興趣嘅基因放大同定量。我唔清楚政府係用邊個 RT-PCR assay kit 啦。但根據美國疾病控制和預防中心(CDC)提供畀Testing lab嘅指南,檢測引物係用來測試 2 段 SARS-CoV-2 嘅核殻蛋白(nucleocapsid protein)(見下圖):


 

廣告

咁如果檢測唔到 SARS-CoV-2 嘅基因,係咪代表冇中招呢?咁當然唔係啦!檢測唔到,可能當事人真係無染疫(真陰性),但亦係可能係測試過程出問題,引致有漏網之魚。呢啲實驗通常會有個 internal control,以確定實驗人員成功提取「人類基因」。所以會有個引物用來放大一段「人類基因」去排除實驗失敗的可能性,而 CDC 建議係用人類 RNase P 基因來做對照。若果實驗人員成功提取「人類基因」,無論當事人有無染疫,都可以檢測到呢段「人類基因」。所以檢測「人類基因」係用來做 quality control,並非如大家所言,一定要做基因圖譜分析先知個 sample 入面有冇人類基因。

至於袁教授指有關人士用「水喉水」作弊,我諗呢個推斷有啲武斷咗少少。RT-PCR 檢測唔到「人類基因」,可能係提取過程出錯,取樣時失誤(你叫人自己交 sample,啲人點識攞,我都唔識啦),運送過程時基因已經降解,好多可能性。我諗你上庭告個班人,都有排同你爭論。

當然,我唔係要為個政權洗白,呢一年大家對政府個信任度跌至低點,要相信政府保障檢測人士嘅私隱,唔將其基因送中做基因排序,的確困難。之前都同同行討論過,有心攞檢測人士嘅 DNA,技術上係可行,有心一定做到。做完,大家都唔知。大家自求多福了。天佑香港。

相關報道:

袁國勇揭3%樣本無人類DNA 水喉水扮唾液 檢測者作弊

袁國勇倡動用萬名紀律部隊 助追蹤檢測密切接觸者 指有高危群組交水喉水檢測

作者 Facebook

發表意見