立場新聞 Stand News

「大笨象,揸枝槍,去打仗」下一句係咩? 1.2 萬受訪者初步調查結果

2020/5/6 — 18:10

【文:Matthew Sung;圖:阿擇】

上個禮拜我同 Taku Ryu 就「『大笨象,揸枝槍,去打仗』下一句係咩」進行咗一個問卷調查,反應相當熱烈。我哋預咗收集大約一萬個回覆,最終收集到嘅回覆超過萬二!多謝各位嘅幫助!

我哋今次嘅研究主要係想知道:1)「打唔贏」同「打完仗」呢兩句嘢邊句出現先?2)遲啲出現嗰句嘢係幾時開始出現? 3)新界九龍同港島嘅變體係唔係真係有對立?

廣告

我哋嘅分析已經有咗初步嘅結果。我哋首先利用回覆裡面嘅線索(幼稚園定小學開始聽到呢首童謠)去推斷受訪者對於呢首童謠嘅接觸年份。我哋嘅調查發現,「大笨象,揸枝槍,去打仗」下一句最初係「打唔贏」。喺二十世紀二十年代之前已經有人講「打唔贏」。雖然我哋數據唔係多,但係我哋發現「打完仗」係後起嘅,而咁啱又喺二戰結束後先出現。

作者提供

作者提供

廣告

(上圖:我哋收到嘅回覆裡面收得最多嘅數據係嚟自1990s-2000s。我哋亦可以見到喺二十世紀二十年代之前已經有人講「打唔贏」;「打完仗」喺二戰結束後先出現。數據係極之唔夠,不過宜家可以做到嘅就係同大家分享現有嘅結果,拋磚引玉 。)

*   *   *

「打完仗」喺港島就係從嗰陣時開始流行。喺九龍同新界,「打完仗」都唔係完全冇人講嘅,但只係佔好少數。個原因有待深入調查。喺七十同八十年代,「打完仗」喺港島嘅使用率達到高峰,達致八成。但到咗九十年代,「打唔贏」喺小學同幼稚園反而變成主流。九龍同新界就一直都係講「打唔贏」為主。整體嚟講,喺七十同八十年代九龍新界同港島係有明顯既對立,亦即係六十尾到八十年代初出世嘅人士最容易察覺呢個對立。

作者提供

作者提供

呢張圖係張綜合圖,將所有答覆(不分年齡)用顏色來顯示。綠色代表「打唔贏」,紅色代表「打完仗」。顏色越深代表越多人用,顏色越淺代表越少人用。現時每個區(受訪者裡面)嘅人偏向講「打唔贏」定「打完仗」都展現得好清楚。港島區都仲係最多人講「打完仗」(南區除外)。

阿擇嘅補充:
個 Scale 係 log(打唔贏/打完仗)
深綠係「打唔贏」壓倒性多過「打完仗」
紫紅係「打完仗」壓倒性多過「打唔贏」
白色即係兩者均等

可以見到就算最多人講「打完仗」嘅灣仔區,都係僅僅過半數㗎咋。

*   *   *

我哋個調查有問到受訪者喺邊度讀小學,因為我哋想知道學校對於童謠傳播有咩影響。可惜現時未有機會分析,希望將來可以再同大家分享。我哋亦未有機會去探索父母嘅童年居住地對小朋友又會有咩影響。最後,我哋亦冇問受訪者搬屋嘅情況。啱啱所講嘅因素都會令我哋對於語言地理變異認識更深,只可惜時間唔夠,唯有等下次有機會再探討。

 

 

發表意見