立場新聞 Stand News

天水圍人想同市區朋友解釋「屯元天」同「輕鐵」嘅概念

2020/12/11 — 9:50

【文:彤姨碎碎唸】

前言:我發現一個人解釋自己住嘅地方,區外人聽完,其實唔會明白你嗰區嘅地理;除非佢已經識附近嘅其他細區,否則佢唔會將你嘅資料 map 到入佢對香港 as a whole 嘅認識。因為你淨係解到你個區「有啲咩」,但無講到「無啲咩」同「點解無嗰樣嘢」。

舉個例,如果你住住將軍澳,你解䆁埋你會去觀塘食飯、去九龍灣買嘢嘅生活地圖畀人聽,再講埋明明喺你附近但又好少去嘅區畀人聽(點解唔會去牛頭角食飯而要去觀塘?新蒲崗啲 Band 房 Sudio Party Room 唔啱你玩?彩虹站你無朋友?);區外人就會對成個區嘅交通、城市發展、人口 (demography),都會有啲印象。聽多幾個區,就會識將香港串埋。

廣告

呢篇文係對屯元天嘅一個印象,因為想區外人易啲明,太多深入嘅嘢就唔講啦。區外人重係睇唔明的話,睇吓圖、睇吓 Topic Sentence 就夠。

利申:我天水圍大,洪水橋讀書,我心目中洪水橋係元天屯之間一個 in the middle of no where 嘅地方。(不過網民提醒,洪水橋屬於元朗,但又有少數元朗網民「覺得」佢屬於屯門)畢竟下面嘅睇法,都係我嘅生活觀察所得,有啲印象其實會畀我嘅生活習慣限制。

廣告

1. 輕鐵係按區域收錢 輕鐵分區域收費嘅,123 係屯門,4 區係天水圍,5 區係元朗。近十幾年,天水圍愈嚟愈多人住,再開多咗個 5A 區(天水圍北)。 輕鐵車費係按照「部車途經幾多個區域」嚟收費,途經一至兩個區收 $5.5,途經三個區域收 $6.5, 途經四至五個區收 $7.5。

作者提供

作者提供

2. 輕鐵有好多條線,按字頭分區 5 字頭線係 [屯門線],6 字頭線係 [屯門 / 元朗線],7字頭線係 [元朗 / 天水圍] 或者 [只行天水圍] 嘅線。

3. 對天水圍人嚟講,屯門係一個謎 其實天水圍去屯門,好遠。睇返上面條輕鐵線,天水圍無直車出元朗,無論搭輕鐵,定 [輕鐵 > 西鐵 > 輕鐵] 咁搭,都要轉一兩次車,等埋車,有時八九個字走唔甩。 天水圍人覺得屯門係謎嘅原因係,除咗屯門市中心一帶(屯門市廣場、新墟、置樂等地),屯門好多地方都係屋邨、村屋,係啲無乜事都唔會去嘅地方。望住輕鐵 map,屯門區咁多站,又青山又青松,絕對一個謎。

4. 天水圍人好熟元朗,但元朗人未必熟天水圍 大家成日話元朗係元朗國,但其實天水圍都算係元朗嘅從屬地。 天水圍係純住宅區,區內得兩個大商場 — 嘉湖銀座(現稱+WOO),同新北江(低配版天水圍葵廣)。天水圍嘅其餘地方都係以屋邨屋苑做單位,1-2 個屋邨,就有一個屋邨商場、幾棟學校、一個街市;條路上面機乎無舖頭、食肆。 所以天水圍人去食好西、想多啲選擇咁買嘢、Gathering,近近地會出元朗,遠啲就去荃灣/油尖旺。但元朗人除非探朋友,否則唔多會入天水圍。

作者提供

作者提供

5. 屯門係一個謎,亦同中學校網有關 天水圍元朗share一個中學校網、屯門係唔同嘅個校網。我中學喺洪水橋(元朗區),印象中只有唔夠一成同學會跨區讀書。 我嗰個年代啲勁學校喺曬元朗(天水圍信義呢十年掘起,好似係),即係元朗比較似「中學雞 high society 嘅 cultural hub」。所以 band 1 嘅元朗學校,尤其是英文中學,有好多天水圍人湧過去讀。(不過我估去到 band2/3,係咪比較多元朗讀返元朗、天水圍人讀返天水圍?) 元朗天水圍嘅人互去中同屋企玩,就會認識埋人哋嗰區,但無乜屯門同學,就未必會去屯門市中心(大商場 / 大圖書館 / 補習)+沙灘以外嘅地方玩。

6. 輕鐵嘅區同區之間,有好多荒蕪嘅「過度區」 輕鐵嘅收費區之間,有好多「村味濃」嘅區。 例如天元之間,有「塘坊」、「坑尾」 元屯之間,又有「洪水橋」、「鍾屋村」、「藍地」、「泥圍」 用九龍 language 打個比喻,旺角站尾嘅登打士街好旺、碧街都好旺(有房爆、有雞叫、有天仁茗茶飲),但你唔太會記得中間條咸美頓街有啲乜。 呢啲村嘅輕鐵站,好多都係一大片荒蕪,落咗車行入少少,會有士多仔、村屋,有時啲村會有「隱世美食」。所以天水圍元朗人對呢啲地方嘅認識其實唔多。

7. 元朗小朋友如果喺元朗市區搭車,會畀呀媽呀爸鬧嘥錢 元朗由同一條大馬路連住,就好似你會沿住彌敦道由旺角行到油麻地咁。你行一次街,好易就行到三四個站。 元朗旺區嗰四五個站,由頭行到落尾,廿零分鐘就行曬。所以元朗人唔會喺元朗搭車。

8. 你唔會喺天水圍啲街無嘢好行 天水圍啲站都行到,每個站之間都係大約 3-5 分鐘腳程。但天水圍係「新區」,係用一個個屋苑、屋邨建成,幾乎每個站都係屋苑、商場、學校,條街其實無嘢好行。 你去邊個站,就會行嗰個站嘅商場,食完飯就走,所以你唔會好似「旺角落車行街行到油麻地再上車走」嗰種行街。不過因為條街無乜舖,其實喺天水圍散步,係舒服嘅。

9. 對天水圍南嘅人嚟講,天水圍北係一個謎 天水圍屋邨 92-07 年年開始可以人伙,但住嘅都係天水圍南(除咗屋邨,天南重有大家成日聽嘅嘉湖山莊);天水圍北(即係網民堅稱「一落街全部𡃁仔都講普通話」嗰頭)係後期先開始發展嘅。對天南人嚟講,天水圍北即係「五六年之間突然多咗好多條邨」嗰度。 加上兩個大商場(新北江aka天水圍葵廣、銀座)都喺天南,所以無咩事其實唔會去天北。

作者提供

作者提供

10. 天元人唔會知道「屯門對屯門人嚟講,係咪一個謎」 有時理解唔到一個地方,係大家嘅結構太唔同。

屯門嘅市區好大,加埋有 43 個輕鐵站,但天水圍得 13 個站,元朗得 5 個。其實我幻想唔到,屯門人係咪真係知道曬每一個站喺邊,係咪真係去過曬嗰啲地方。 另外屯門區太大,天水圍人、元朗人同屯門人計劃區內路程嘅方法又唔同。例如元朗人係行落樓,廿分鐘腳程內,就會買到所有生活用品嘢;天水圍人係自己樓下買唔到嘅嘢,就去同區大商場,大商場都無就直接去元朗/ 出市區....ehhh以前未有西鐵,出九龍會塞,都會考慮輕鐵屯門,但宜家西鐵出九龍好過。 到底屯門人係咪會去勻成個屯門嘅呢?呢樣嘢對我嚟講係一個謎

11. 講咗咁耐,其實重有好多村未講 屯元天真係好大,上面講嘅只係佢地嘅市區。其實屯元天重有好多村落、好多屯屋,除非要探朋友,或者突登去「行吓睇吓」,否則大部份人都未去過呢啲村。

愛香港,唔只淨係愛香港呢個概念,重要對呢個地方有認識。期待其他網民分享埋自己住嘅區~

作者 Facebook

 

發表意見