立場新聞 Stand News

【安心出 Trip】疫情下公費旅行開支竟然倍增?!

2021/2/25 — 13:07

作者製圖

作者製圖

疫情及經濟逆轉下,眾多部門要「勒緊褲頭」,但有一項開支一枝獨秀,就係「長期優良服務公費旅行獎勵計劃」,即係獎勵資深公務員去旅行嘅開支【註1】:2021-22年預算達 $2.46 億,係 2020-21 年嘅實際開支 $3,377 萬嘅 7.3 倍,亦比同年嘅核准預算增加 85%【註2】。

政府解釋舊年因為疫情,多達 3,430 位幸運兒要逼埋今年去旅行。疫情下,飛唔飛到都成為問題,但呢筆開支仍然係 2019-20 年實際開支(疫情前)嘅兩倍左右,令人百思不得其解。

「公費旅行計劃經濟圈」早已出現,不少旅行社均有「公費旅行獎勵計劃」package,由歐洲巴爾幹半島、非洲撒哈拉沙漠去到風光明媚嘅新西蘭都有,可謂應有盡有【註3】,係來年全球疫情仍然嚴峻下推行「旅遊氣泡」,邊個會最開心?

廣告

除此之外,唔係資深嘅公務員都有「度假旅費」津貼:高級公務員例如首長級薪級表第 7 點或以上嘅公務員,可以一年最多攞 $79,050 公帑去旅行【註4】,相關開支係 2021-22 年亦達到 $1.45 億【註2】。

雖然獎勵資深員工去旅行係好多大公司嘅普遍做法,但面對財困,政府竟然唔理公眾觀感,繼續「自己獎自己」:每個受惠嘅幸運兒,閒閒地都受資助幾萬蚊【註5】、合資格嘅高級公務員每年亦可以攞 $8 萬公帑去旅行,同樣係 8 萬蚊,失業市民請求政府支援貸款,竟然要比利息,做埋財仔個份。一邊對市民度縮,一邊對自己人大開水喉,說好的財政紀律去左邊呢?

廣告

#財政預算案
#安心出Trip
#開放資訊研究

【註1】長期優良服務公費旅行獎勵計劃「旨在獎勵長期服務而表現持續優良的員工,向獲選的本地非首長級公務員及其同行人士發放旅行津貼 。」,以往只容許員工同行配偶獲資助,林鄭月娥喺 2018 年施政報告放寬限制,連員工一名同行親友或長期伴侶都可以獲資助,2017 年獲獎人數達 2510 位

公務員事務局 長期優良服務公費旅行獎勵計劃 

立法會 公務員及資助機構員工事務委員會 2018 年 11 月 19 日舉行的會議有關公務員嘉獎計劃的最新背景資料簡介

【註2】2021 至 22 年度財政年度政府財政預算案 總目 46-公務員一般開支 

【註3】金怡假期 公務員【長期優良服務公費旅行獎勵計劃】旅行團

JeTour 長期優良服務公費旅行獎勵計劃 

【註4】公務員事務局 度假旅費 

【註5】2019年4月3日 TOPick 政府擲 1.31 億元獎勵 2500 公務員去旅行 包食住人均資助 5.2 萬 

▍研究到底 參與小額月捐支持

作者 Facebook
 

發表意見