立場新聞 Stand News

富豪熱錢炒樓神器最新數字大破解!

2020/6/14 — 15:49

本土研究社製圖

本土研究社製圖

早前本研社團隊諗到條好橋,委託立法會議員問財庫局關於近年「表格 IRSD102」填寫遞交數字(註 1),終於洩露了現時全港用「借殼買樓」方法(以「公司股權轉讓」方式作物業交易) 炒樓避稅可以有幾大規模。

交代番,「IRSD102」本身係一份物業附表表格,當私人公司辦理股票轉讓加蓋印花手續時,若該公司在股票轉讓時持有物業(註 1)的話,就必須向政府申報有否購買任何物業、物業購買權或投資。如果非上市公司要透過公司股權買賣物業,就一定要填寫呢份表去申報,所以係一個會睇到透過轉讓公司股票作物業交易或轉手既實質數據,過往好少人問過。

而財庫局喺財委會最新公開嘅數字,顯示收到「表格 IRSD102」數目由 15/16 年嘅 2,311 份上升至 18/19 年嘅 3,400 份,升幅近五成(註 2),2019-20 年首 11 個月都有 2,891 份,可以預期全年都有約 3,000 份。由此可以推斷,近年透過轉讓公司股權方式買賣物業避稅嘅情況明顯愈來愈嚴重。

廣告

一般人以非首置身份買入物業,需要繳付高達 15% 的買家印花稅(非香港永久性居民及公司買家),再加 15% 的從價印花稅(個人名下持有任何住宅物業 — 即係非首置),而三年內轉售住宅物業,就要跟持有年期比 10%-20% 額外印花稅。

廣告

但係如果你識玩,透過公司股權轉讓買賣物業,印花稅便只需繳付股值的 0.2% 的印花稅率。假如一位非香港永久居民以公司身份買家購買一間 1,000 萬元嘅單位,而家需要繳付買家印花稅和雙倍印花稅,合共佔樓價 30%,即港幣 300 萬;但係以公司股權轉讓方式交易物業,買賣雙方只須繳付 0.2% 的股票轉讓印花稅,稅款只是港幣 2 萬元,係原來稅率 150 分之 1。窮人首置都要比 4.25% 啦。三大辣招就淪為咗規限一般市民嘅窮人稅。

政府一直都話投資需求數字低,只講每年要交買家印花稅等成交數字以 2017/18 年度為例,總共有 4,358 宗買家印花稅的成交(註 3),而新資料反映同年有足足 3,396 宗轉讓公司股權方式買賣物業嘅個案,按政府嘅說法足足低估咗四成有多。

本研團隊喺 2018 年發佈嘅「富稅難收」研究報告(註 4)入面個案,分析過 126 宗新聞報導過嘅股權轉讓交易,已經計到合共避稅 94 億,其中近六成個案嚟自外地個人買家,外地註册公司同來港未滿七年移民。依家近年平均每年都成約 3,000 宗,潛在避稅金額肯定過數百億,但係政府一直當睇唔到,繼續留個免稅漏洞俾外來買家熱錢入嚟買樓,所以武漢肺炎、中美大戰,香港樓市依然咁 crazy 唔係冇理由。

去年送中惡法有種講法話其中一個目的,就係想捉到呢班利用香港走資嘅內地商人同高官,國安法就嚟唔洗送上大陸都直接就地正法,大陸官員成功攬炒自己啲錢,香港變直轄市,房地產仲做唔做到走資避險保險箱呢?

 

#托市神器
#稅是給一般人交的
#富稅難收

註 1:透過 IRSD102 表格申報的物業包括:住宅、商舖、寫字樓、工廈及其他。由於沒有細分的數字,由過去十二個月土地註冊處的數字顯示,住宅佔整體物業註冊宗數 89%,推斷大多數申報 IRSD102 表格的股權轉讓均是住宅成交。
註 2:〈審核二零二零至二一年度開支預算:管制人員對財務委員會委員初步書面問題的答覆〉,財經事務及庫務局,347-248 頁:
註 3:〈審核二零一九至二零年度開支預算:管制人員對財務委員會委員初步書面問題的答覆〉,財經事務及庫務局,83 頁:
註 4:《富稅難收:香港股權轉讓住宅避稅研究》:

Follow 我地:📸 IG / 🖨 TG / 🎥 YouTube
🧠 研究義工報名申請表
🏅 月捐支持

本土研究社 Facebook

發表意見