立場影像

立場影像

2020/2/12 - 22:05

【專訪】疫症下苦中作樂 Luna Is A Bep:香港人要行開下

「我想行開下,忘記咗呢個世界啊!」網上短片大媽說的這一句話,相信是不少香港人這陣子的心聲。90後說唱歌手 Luna Is A Bep 新作〈我想行開下〉便以此為靈感,道盡了港人疫症下的無奈與辛酸,令大家在鬱悶的 Home office 之中尋回一點快樂。

「我好無聊啊/無返工兩個禮拜」

廣告

本身從事傳媒工作的 Luna 和不少打工仔一樣,農曆年假期後便因為武漢肺炎,開始在家工作。Luna 兩年前以「Luna Is A Bep」的名義出道成為說唱歌手,作品一向是低成本創作,在家用一枝咪、一部電腦便成事,因此留在家中的時間多了,便萌生起創作的念頭。

「唔可以再咁懶,要做番啲嘢!」Luna憶述當時這樣跟男友說,二人便開始即興創作了一些小節,但仍然不合心意。她突然想起網上流傳一段短片,一個大媽對着電話說:「我想行開下,忘記咗呢個世界啊!」覺得很呼應她當時的心情,再加上近日人人瘋搶口罩等所見所聞,便即日錄製了〈我想行開下〉這個作品,還在家裡穿着家居服兼素顏拍MV,男友負責混音和剪接,用了三天便完成作品,上載互聯網。

作品推出不過數天已有過萬點擊,迴響比起她其他作品來得快,Luna笑說:「因為大家真係太得閒喇,都喺屋企玩電話。」 她表示,不少人都留言指聽過這首歌之後,抒懷了不少,更有人發短訊多謝她說:「因為鋪頭生意唔好,老闆好嬲,但佢聽完首歌心情又好似好啲。」原本 Luna 一向害怕作品會被指是「政治抽水」,但見到大家反應熱烈也覺得很高興,「呢啲歌唔襟聽,唔係啲失戀嗰時你會拎番出嚟聽嘅歌,但佢就係記載緊呢個時代發生緊嘅事。」

「電視嗰啲妖魔鬼怪/叫人慳口罩冇病咪鬼戴」

面對疫情,Luna 坦言有點難以喘息的感覺,「之前係社會運動,而家係社會運動再加疫症,就覺得好攰啊。成個社會的營運好像停頓咗,然後啲人又搶呢樣搶嗰樣,好多恐慌,呢啲都是突如其來要面對。」談起口罩,Luna更肉緊地說:「當初你唔信呢班黃絲、暴徒、廢青!好心提你,但你叫人唔好戴(口罩)。大佬呀,無辦法㗎喎,我覺得今次係有啲喚醒咗呢班人,因為你自己都在受苦,就睇到你一直擁戴嘅政府做咗啲咩。」

困在家中半個月,Luna 說除了作了這首歌之外,都沒什麼生產力,嘆息大好青春就此消耗﹐「 Suppose 20幾歲至30歲係冇咁多負擔,但因為呢個環境、社會同政府,令我哋嘅生活唔係我想像中咁美好。」覺得生不逢時?「咁又唔可以咁講,可能每代人都有自己嘅 struggle,例如97年都有金融風暴、主權移交,佢哋都可能承受住一啲恐怖或者不安。」

當老一輩經常說90後是廢青,Luna 毫不介意,反而會站在他們的的角度去想,只因明白人人都有自己的人生,「我都想過自己嘅生活,在能力所及之下,我都覺得要及時行樂。」

Luna Is A Bep - 我想行開下
Lyrics: Luna Is A Bep
Beat: Narayana Johnson
Mixing: Norman Chow

我想行開下忘記咗呢個世界
我想行開下忘記咗呢個世界
我想行開下忘記咗呢個世界
我想我想忘記咗呢個世界

我想行開下忘記咗呢個世界
我好無聊啊冇返工兩個禮拜
日本城係咪有米派
排到我啲外科口罩又賣晒
電視嗰啲妖魔鬼怪
叫人慳口罩冇病咪鬼戴
佢係咪傻撚咗佢係咪太緊火
呢幾年係咪瞓咗 個腦又係咪揼咗
俾佢管香港人命途坎坷
今次點算喎
麻煩只會更多今次點算喎

我想行開下但係我唔夠口罩
我想買口罩藥房佬攞晒黎炒
啱呀啱呀香港好自由
發國難財嘅自由市場最自由你都戇鳩

幾好林鄭月娥幾好陳肇始幾好能力幾高
幾好幾好幾好幾高

我想行開下但係我唔夠口罩
我想行開下但係我唔夠口罩
我想行開下但係我唔夠口罩
我想行開下但係我唔夠口罩

採訪:Rachel Tang
影片製作:Fred Cheung