立場新聞 Stand News

我可以舉手,發問嗎?

2020/6/14 — 10:54

【文:觀塘循道衛理社會服務處神愛關懷中心】

新冠肺炎疫情爆發不久後,小朋友就開始停課。由農曆新年至今,已經差不多五個月了。整個疫症內,小朋友不被當作持份者,同時,亦置放他們於被動的角色。他們被告知學校要停課,被告知需要留在家中,忠告要好好戴上口罩,每天依時網上上課,自行做功課,依時由媽媽到學校交功課…...。小朋友都按著大人的意思去做;因為他們都相信,大人的指示,都是「為自己好」的。隨著社區設施及遊樂場的關閉,父母收入大減,社區對疫症焦躁的情緒,與親人/朋友分離,長期留在家中的孤獨感,持續網上學習壓力等等,這些突如其來的轉變,嚴重影響小朋友心理及精神健康。但是,又有多少人曾用心向小朋友疏解他們對解疫情的疑問?又有多少人會疏解小朋友在疫症期間心情起伏,忐忑憂慮的情況?

紐西蘭、挪威、芬蘭,以及台灣等都在疫情期間舉行兒童專屬記者會,讓元首、部長等官員回應兒童的提問。面對兒童,大人都將說話速度放慢,用兒童理解的方法,解釋當前的情況。可惜,香港社會並未見以上的討論,兒童的聲音如同隱形。故此,我們透過網上視訊平台,為孩子舉行一場問答活動,並邀請兒童事務委員會委員和護理系講師回應兒童許多心中的問題。

廣告

兒童事務委員會委員: 兒

廣告

護理系講師 :護

主持人:主 

主: #小朋友,你地可唔可以畫低你地係疫情期間的心情呀?

「唔使番學,可以瞓覺,所以我係星星眼」

「好唔開心,因為幾個月無得出去」

「我好嬲,因為日日留係屋企

「留係屋企,就好似坐監甘樣,被困左六個月」

「我好開心可以煮餸,可以自己煮一餐飯」

「我好擔心自己會染病,擔心到有五星」

「我鍾意打籃球,但球場開得好少,我唔郁會成身軟奶奶嫁」

「我最多要3日郁一次,唔係會累死嫁」

我想問…

#新冠肺炎係點來嫁?

護: 依家未確定得到來源,但最早在大陸武漢發現,可能我地食或者接觸左一D動物,佢地身上有一D細菌同病毒,傳左比我地。正常在動物身上的細菌同病毒,在我地身體生存唔到,但唔知點解佢地好似數碼暴龍甘進化,佢地進化到可以適應人類的環境,就不斷繁殖、生長,令我地有病。我地周圍去,唔小心打個乞嗤,就會將病毒、病菌傳比其他人。

#新冠肺炎同平時既病毒有咩唔同呀?

護 : 病毒好似人一樣,每個都唔同。佢哋嘅傳染性,可以用着唔同的衫去做比喻。有病毒弱啲,就好似著T恤咁,影響力唔係好嚴重。有啲勁啲,好似新冠肺炎咁,就好似著咗件好勁的盔甲咁,攻擊我哋身體。所以不同種類的病毒,所引發的病症,後遺症都唔同。

新冠肺炎病毒最主要攻擊我地的肺部,令到我地肺部感染。如果我地的肺有病毒,呼吸唔到,唔夠氧氣,就會窒息。而其他病毒未必攻擊你的肺部,後果或者無咁嚴重。

#我聽過呼吸機,係咩來嫁?

護: 我地個肺好似汽球甘,可以吹漲,有彈性。但新冠肺炎會令到肺的彈性越來越差,好似條橡根變硬左,拉唔到,吸得唔夠氧氣入肺裡面,呼吸機就可以打D氧氣入肺裡面,令佢夠氧氣用。

#我學校有D同學在假期番左大陸,再番香港隔離14日,但我驚佢地有隱形病毒,潛伏期唔止14日,會係更長時間,驚佢地會散播病毒。

護:有部份學校會將同學的座位隔開,或者用膠板將同學與同學之間的座位相隔,都可以隔到少少口水。每位同學都要戴口罩,就算唔知自己有無病毒,都可以減少將病毒帶比其他人。雙手接觸過任何物品都要洗手,有時我地好想掂口罩外面,都要記得要先洗手,或用搓手液,再掂自己的臉。番到學校,第一件事就要洗手...…同時要保持自己的免疫能力,如果好疲倦無精神,就唔好去人多的地方,休息多D,做好保護自己的措施。

#我地幾時有得打疫苗?甘我地就唔使戴口罩,唔使怕啦。

護:你講得喏,但研究藥需要時間,最快都要1年至幾年時間,研究出來的藥要首先由動物、老鼠、馬騮身上試,再到由人試,先可以大量生產,推出市面。暫時美國、英國都研發到疫苗比動物試,暫時好似無負作用。不過,未在人身上試驗。在未研發得到疫苗之前,我地要做好保護自己的措施。

#如果有人打左疫苗,死左點算?
護:疫苗唔係100%無事的,好多疫苗最嚴重的後果係會死亡。如果100萬個人打左疫苗,當中有2個死亡,但有999,998個人好番,那這種疫苗都值得使用,因為可以保護到大部份人。

#疫苗會打係咩動物身上?

護:白色的老鼠,倉鼠,馬騮,一D同人相似既動物。

#馬騮跑得甘快點捉呀?

護:唔使捉嫁,個d馬騮係由人培育,唔使捉。

#今年仲有無暑假呀?

兒: 之前兒童事務委員會同教育界的委員都討論過,但未有定案。因為停課好長時間,大家一直無番學,有機會將暑期縮短,追番之前本身要學的課程。但未有定論,要視乎疫情的變化。

#幾時唔使戴口罩呀?

護: 現時都唔知,但為了自己健康,即使將來政府話唔使戴口罩,但如果自己有病,都要戴口罩。今次是一個很好的教育,大家都知道戴口罩可以保護自己,記住今次的教訓,提高自己的健康意識。

#我地甘耐係屋企無得做運動,就會肥啦,我地依段時間都係屋企上網堂,但知識唔會好似正常番學甘多,我地再番學既時候,知識都還番比老師,我想問有咩應對的方法?

兒: 我同你都有同樣的擔心,擔心無得做運動,自己會肥,依家有唔同的社福團體在網上教人點樣在家做運動,例如拉筋,可以試下。

兒童事務委員會都擔心小朋友追不上功課這問題,我地都有同政府講,可唔可以提供一些免費補習比小朋友。有D小朋友屋企無wifi,要用爸爸媽媽的手機上網,好難做網上補習,所以我地同政府提出可唔可以提供一些免費上網卡比有需要的小朋友,等大家都可以穩定甘上網。

#點樣先可以叫人自動自覺戴口罩呀?

兒: 我留意到有兩類人特別多唔載口罩。第一類係老人家。我試過隨身帶備兩個口罩,當見到有人無戴口罩,會主動遞比佢。無戴口罩可能有唔同原因,較早時候,可能因為買唔到口罩,或者買唔起口罩,如果我地有充足口罩的時候,可以主動遞比佢,佢就可能會戴。即使有些人原本唔想戴口罩,佢見到你有禮貌甘關心佢,都可能可以鼓勵到佢地帶口罩。第二類,就係每紀太細的小朋友,戴完口罩就整甩,所以只能夠盡量遮住口鼻。

許多孩子在疫症初期,因著停課不用上學而感到開心。到後來留在家中鬱悶,反而渴望上學。最後教育局宣布復課,卻擔心功課未完成而被老師責備,內心好想逃避。種種心情,在大人眼中看似小事,在孩子的世界都是大事。大人對疫情抱有疑問,小朋友都一樣。兒童同樣關心疫情的影響,都希望有人能夠解答。我們常說兒童是社會的未來,但社會卻未曾允許他們參與。兒童的感受和聲音都被沒埋。這個現象,不會很諷刺嗎?

所有小學生都要復課了。小朋友們,你習慣嗎?

 

發表意見