人在中環 - CK

人在中環 - CK

我係一隻又笨又固執嘅豺狼。著有《人在中年》。

2020/2/3 - 13:50

搶乜都好,香港人係永遠唔夠北面鄰國人搶

市民排隊買口罩

市民排隊買口罩

1) 有人笑香港人喺度搶口罩。疫情保守估計要幾個月,你如果屯積一萬幾千個以備「不時之需」,咁就當然值得被恥笑,但係好多人屋企嘅存貨分分鐘唔夠兩個禮拜用,點唔搶呀?

2) 講開搶,搶乜都好,你會發現香港人係永遠唔夠北面嘅鄰國人民搶。香港人嘅所謂搶,都係排隊買,上網鬥快㩒,全部跟足規矩做的。深圳河以北嘅習俗係,當為咗生存,係可以好不擇手段的。抬 cash 去高價搶你訂咗嘅貨又得,明去爆你格搶你倉裡面嘅貨亦得。香港人冇錯係反應快,亦有小聰明,太平盛勢嘅時候可以賺到甜頭,但風頭火勢之下,綿羊係永遠唔夠豺狼鬥的。綿羊嘅生存之道,一係將自己變埋豺狼(which 大部份嘅人都接受唔到……),一係就係盡量敬而遠之,減少彼此來往。

3) 點解搶,除咗驚之外,更能反映到嘅,係全港市民對政府不信任。好似我呢亭刁民唔信任政府好正常,但深藍嗰班,你學咩人去不信任政府呀?人搶口罩你又去搶,仲要搶到咁狼,問過你老細未呀?

廣告

4) 我同屋企嘅老人家講,唉,幾唔鍾意,幾困難都好,要認真學識上網啦。上網唔係淨係用嚟 send 長輩圖咁簡單,而係,最低限度,學.識.網.購.呀。啲仔女同孫,未必嘢嘢都可以及時幫到你哋㗎。如果唔係,就要倒塔咁早,天寒地凍走去排隊買嘢,陰功豬㗎啦。

5) 又,仲要記得提防屋企有個敗家仔呀。口罩依家仲值錢過 Hermes 袋,你辛苦撲咗返嚟,自己都唔夠用,但敗家仔轉頭慷你嘅慨送哂俾人,你就激心啦。你睇吓我哋政府做過啲咩?

 

(標題為編輯所擬)

作者 Facebook