立場新聞 Stand News

政府唔會講嘅嘢 — 第三間醫學院

2021/2/8 — 9:39

作者製圖

作者製圖

香港人,應該諗點樣建設香港,而唔係破壞香港僅存嘅優秀。

香港唔夠醫生,應該諗點樣令香港可以培育出更多一流嘅國際頂級醫療人才,而唔係主張破壞現時優秀嘅水準,去唔知邊度引入一班質素參差嘅「海外醫生」。

今時今日做公共政策倡議或者天真,但描繪我地所想建構嘅香港,依然係每一個珍惜呢片土地嘅香港人嘅責任。

廣告

1968年,因應當時香港醫生不足問題,市政局議員黃夢花醫生提出興建第二座醫學院。1974年,立法局正式拍板通過籌建第二所醫學院。之後再用左不過係六年時間籌建,中大醫學院於1980年正式成立。當時,威爾斯親王醫院仍未建成,中大醫學院首三年嘅學生,必須去到聯合醫院上堂,亦係多得聯合醫院嘅醫生仗義幫助教學,先得以成事。

廣告

五十年後今日,中大醫學院都已經成為令香港人安心、可以係世界舞台立足嘅一流學府。

呢一種建設香港嘅決心,係香港昔日可以作東方四小龍之首嘅原因,亦係喺現時主權移交後嘅香港政府上睇唔到嘅嘢。

香港醫生短缺,冰封三尺,大家聽都聽左十年都有,卻從未聽聞政府如何認真去研究、策劃第三間醫學院,去令香港有更多優秀人才。反而,只有順住政治動機,日日向香港人強行推銷,「中国醫生都好好架,大家唔好歧視。」本末倒置至此,違背同出賣香港人嘅利益、安全,令人心寒。

確實,不論黃、藍陣營,都會有人質疑我地本地醫學界,係咪出於保護主義,自己嘅飯碗去反對增加醫生人手。今日,我拋出第三間醫學院嘅討論,就係話比大家知,我地唔係驚多醫生,係驚唔合格嘅醫生。

反觀政府對於第三間醫學院嘅主張,每次都輕輕帶過,顧左右而言他,然後就話不如諗下海外醫生。

林鄭話:需一段很長時間去處理軟硬件問題,才可建設一間全新的醫學院」。

千里之行始於足下,你咁鐘意推啲難推嘅嘢,逃犯條例你又咁熱心做,第三間醫學院你開始諗下都唔得?中大醫學院由拍板到成立,都不過六年時間,如果林鄭一上台嘅時候開始拍板籌建第三間醫學院,話唔定過多兩年已經有了。

陳肇始:若開設第三間醫學院將會分薄人手

香港從不乏一流嘅醫生,而作為一個學生,我好清楚其實培訓優秀嘅執業醫生,好多時候唔需要真係學術界嘅教授,而係前線醫生就算冇咩科研、學術背景,都可以教得好好。只要政府同當局願意投放資源,好多醫生現時唔係醫學院嘅醫生,都願意協助培訓下一代嘅本地醫療人才。要知道,現時中大四年級生、港大五年級生,大部份時間都係去Peripheral hospital,接受醫學院外嘅非學術醫生教導,而呢一班Peripheral hospital醫生,大多甚至係免費係工餘時間幫手教。香港嘅醫生前輩係無私到免費教都肯,你政府肯撥資源,會吸引唔到人才。

仲有,你只要有資源、有學術發展嘅空間,唔好郁啲就攻打人哋啲大學,就自然吸引到世界各地嘅人才黎香港發展。

初期先招收較少量學生,同埋專注較多係教學(相對科研),香港絕對有能力建立多一間優秀學府。

偏偏政府做嘅,卻係全體醫管局醫護係疫情下凍薪、2019年撤回醫學院撥款。一邊踐踏香港嘅醫療發展,一邊將公帤亂用係大白象建設,再引入參差醫生。

第三間醫學院,香港做唔到,新加坡做到。

2010年,係香港政府同建制派主張緊引入海外醫生時,南洋理工大學正式拍板,同世界一流嘅倫敦帝國學院合作,建立新加坡第三間醫學院。LKCMedicine 2013年成立,2018年首批醫生進入巿場。

2021年南洋理工大學醫學院新院長係邊個?

沈祖堯。

香港政府,就係呃你香港唔夠人才,話我地起唔到第三間醫學院,所要要搵暨南大學醫生醫香港人算。新加坡,就坐言見行。結果,香港嘅世界頂級人才,就去左外地,香港人就等被暨南大學換血。


啟德醫院,將係2025年落成,要做一座新嘅教學醫院,而家開始討論策劃係最好嘅時機。

當然我呢個係好初步嘅拋磚引玉,最後係咪做得成,冇人知。但一個冰封三尺嘅本地公共議題,政府完全唔去考慮從發展本地嘅方向著手解決,係無可能犯嘅錯。
我對政府冇期望,但我對香港人有希望。而要救返香港,我地必須要永不放棄,去論述我地對呢片土地嘅想像。
 

發表意見