立場新聞 Stand News

【月經 post】其實都係打郊野公園主意

2020/8/19 — 19:18

房委會資助房屋小組主席黃碧如(圖片素材來源:公屋聯會 YouTube 影片截圖、政府新聞處)

房委會資助房屋小組主席黃碧如(圖片素材來源:公屋聯會 YouTube 影片截圖、政府新聞處)

房委會資助房屋小組由一位黃主席,換咗另一位黃主席,一出來講嘢就「招呼」郊野公園,雖然已事隔幾日,但見呢位黃主席新上任咁有「大志」,真係應該講多幾句「招呼下佢」!

1. 你如果真係聽番成段訪問,呀主席其實係無講清楚「郊野公園緩衝區」實際係指邊度,佢係指郊野公園嘅「內圍」還是「外圍」?「內圍」嘅話,咁《郊野公園條例》就只有郊野公園,無「郊野公園緩衝區」呢個 term 嘛,「外圍」嘅話,咁你其實係咪講緊「綠化地帶」?

2. 唔理你核心「外圍」定「內圍」,緩衝區嘅功能,本身就係要限制發展,保護好似郊野公園具生態、景觀價值嘅地方呀,唔好再偷換概念,以為緩衝區唔用,就係好浪費土地資源好唔好?

廣告

3. 佔用市區土地嘅康樂設施、體育會,唔少都佔地甚大,既附帶大量額外嘅配套設施,好似餐飲設施、貴賓房、會所等,又要鋪石屎鋪人工草皮之類,對環境做成嘅破壞唔會比建屋小,加上好多郊野公園、綠化地帶都係高山低谷,要「安置」呢啲康樂設施,除咗大規模開山劈石,都唔係點諗到點攪

4. 呢啲康樂設施、體育會,以往不斷俾人批評係「私人俱樂部」,免地價或象徵式邀付低地價,卻只局放開放用地俾公眾使用。將佢哋搬入所謂嘅「郊野公園緩衝區」,係咪只不過將呢類不平等待遇延伸,將明明係公眾共用享用嘅「郊野公園緩衝區」,變成「私人遊樂場」?

廣告

5. 其實,上年漁護署已經完成「提升郊野公園及特別地區康樂及教育潛力」嘅顧問研究,整全地去檢示郊野公園用地如何滿足公眾對郊野康樂活動日漸增加嘅需求,包括改善現有基建設施,設立開放式博物館等,如果主席嘅初心,其實係想加強郊野公園本身嘅康樂功能,咁跟番政府本身做好咗嘅研究就可以喇,唔使再節外生枝(咁當然你真係聽番成個訪問,佢個初心係點,大家心照)

6. 咩嘢善用郊野公園「緩衝區」,同前幾年開發郊野公園「邊陲」嘅邏輯,都係同出一轍:攪完眼前「緩衝區」,後面就會再多一個郊野公園「緩衝區」,即係另一個可被「善用」嘅地方,開發郊野公園呢個缺口,就可以愈開愈大

P.S. 見大家無咩點講,咁順便講埋啦,其實除咗郊野公園,黃主席都有講明日大嶼呀,佢話叫大家要「探討下」,「即係有時要平衡下囉」。嘩探討下、平衡下就要倒成萬億落海,佢真係好慷慨,慷香港人之慨!

傳送門:聽番佢點講「善用」郊野公園緩衝區土地(由 21:25 開始) 👇👇

長春社製圖

長春社製圖

 

#隔咗幾日都要繼續講
#保衛郊野公園
#saveourcountrypark

長春社 Facebook

發表意見