立場新聞 Stand News

有火定冇火 弱勢煙民最火

2018/1/9 — 17:32

在煙民圈子十分流行的 Iqos 電子煙 l youtube片段截圖 l 資料圖片

在煙民圈子十分流行的 Iqos 電子煙 l youtube片段截圖 l 資料圖片

【文:幕後新手】

澳門早幾日宣佈新控煙法生效,原來包括埋禁售電子煙。作為IQOS用家,睇到新聞時同行友人都有同一個問題:咁IQOS得唔得?

睇返法例,原來IQOS定義上唔算電子煙,即是話澳門新例,其實係唔適用於IQOS的。再睇埋其他國家,唔少都已經有清楚界定,將加熱煙(heated tobacco products)同電子煙(electronic cigarette)區分,然後再根據分類實行規管。一句到底,其實就係有煙草同冇煙草嘅分別。IQOS就係加熱煙嘅一種,雖然有煙草但係唔用燃燒嘅方式令佢釋出尼古丁。

廣告

咁香港政府呢?黎緊4月先話會上立法會講規管電子煙,仲要唔知包唔包加熱煙。大佬呀,我等得你立法都唔知幾耐,係咪變相令我地呢啲轉用左加熱煙嘅人逼住食返煙仔先?其實有幾難明,有火同冇火,咁梗係冇火冇咁唔健康架。你唔好同我講你寧願吸BBQ啲煙都好過吸打邊爐啲水蒸氣。早幾日見到有個港鐵廣告,話咩有煙無煙都是禍,咁我諗對佢地黎講可能薯仔同薯片係同一樣野,到時同你講有油炸冇油炸都是禍。

以前食開煙仔,試過IQOS之後已經返唔到轉頭,我相信唔少人都有相信感受。加上依家科技日新月異網上可以買到愈黎愈多唔同類型嘅加熱煙。真係難以相信今時今日咁「開放先進」嘅香港竟然有班人自己唔食煙就將全部有個「煙」字嘅嘢都要禁,到時世衛又走返黎同你講你碟all day breakfast有一半會致癌,搞個「無煙肉香港」唔俾你食嘅時候唔好喊。學火姐咁講:「我真係火都黎呀!」話就話共融社會,連基本選擇權都冇,你都咪話唔火。
 

廣告

發表意見