東鐵綫點樣可以喺1小時內塞到32班車？

【文：Bruce Tse，北區居民】

前日我捉到鹿唔記得脫角(見：東鐵綫將減三卡車　真係可以加班次抵銷影響？)，果隻角係點既呢？

拿，MTR Service Update話早繁要由每小時24班車加到32班先剛好抵消減3卡既影響，做唔做到呢？我地可以計下數：

1分鐘有60秒，1個鐘有60分鐘，即係1個鐘有3600秒（60 x 60）。係呢3600秒裡面，究竟可以行到幾多班車呢？

根據我星期一既觀察，8點至9點，有23班車經過大圍站（未減3卡，都已經meet唔到最高班次既target），每班車平均相隔56秒，上落客（包括埋站、停車、開門、上客、落客、關門、開車，離站）平均係1分48秒。

如果由每小時24班次加到32班次，雖然訊號系統更新左，但只能縮短每班車的距離（港鐵既術語係「區間」，Overlap），唔可以加快上落客時間。不過，我好人，我當上落客時間都快左（用日本果種靠職員一腳伸你入車既方式），假設：

1.) 每班車既平均上落客時間由1分48秒加快到1分30秒，即係90秒，1小時有32班車，即係90 x 32 = 2880 秒。

2.) 1小時有32班車，中間有31個空檔（車與車之間的距離），每個空檔由而家平均56秒，加快到30秒（嘩係，快到我都唔敢相信）。30 x 31 = 930秒。

3.) 2880 秒 + 930秒 = 3810秒。不過，1小時只得3600秒咋喎！

提一提大家，港鐵之前親口承認（係交比立法會既文件裡面）：「最高班次數目在技術上已無法達到原先設計的水平。」我想問港鐵，將來東鐵綫點樣可以喺1小時內塞到32班車？