立場新聞 Stand News

林哲玄醫生的雙重標準

2020/2/7 — 16:05

林哲玄(資料圖片)

林哲玄(資料圖片)

公院醫護罷工一星期,受到社會上不同壓力團體嘅大力攻伐同抹黑,最近有醫學會副會長林哲玄醫生企喺道德高地指責罷工醫護嘅一番言論最為人矚目:

  1. 反問醫護天職和初心為何
  2. 如果無哂口罩防護裝備,假如兩天才准換一個口罩,大家預期係做定唔做?係咪唔夠保護衣物就可以「落更」
  3. 堅持一個底線,就係無論任何工業行動,都唔會影響市民,呢個底線係不能逾越的。

嘩,講到咁偉大,唔知以為佢係沙士英雄,當喺威記 8A 病房打滾過,置生死於度外、身先士卒嘅前線醫生,所以忍唔住上網 Google 下林醫生嘅專業:

根據某網上醫生資料庫

廣告

林哲玄醫生 Dr. LAM TZIT YUEN, DAVID
男醫生、西醫、外科、私人執業
使用醫院:播道醫院, 香港港安醫院, 香港浸信會醫院, 港中醫院, 養和醫院, 明德國際醫院, 寶血醫院, 聖保祿醫院, 聖德肋撒醫院, 荃灣港安醫院, 仁安醫院

哦,原來唔係公立醫院醫生,係私人執業嘅外科醫生,連肺炎都唔駛醫嘅外科醫生,咁公院醫生罷工,關佢咩事呢?不如我哋睇下林醫生掛牌嘅幾間私家醫院係武漢肺炎疫情下做咗啲乜?

廣告

播道醫院:不接受 14 天內有離港、曾有去過武漢及湖北省嘅人入院;有發燒、咳、鼻水及曾接觸過確診者,不接受入院

港安醫院:凡進入醫院範圍,先進行分流、測試,才決定入院與否

浸會醫院:14 天內有離港,不論港人及內地,不接受入院;有流感病癥(如發燒、咳、流鼻水)不接受入院

聖保祿、聖德勒撒醫院:14 天內有離港(武漢及湖北省)不接受入院;有肺炎、流感病癥(如發燒、咳、鼻水),港人可能隔離病房或呈報衞生署,其他不接受入院;內地人士沒有癥狀及沒有去過其他災區可接受入院但必須住私家病房

仁安醫院:曾經在內地醫院、診所就醫,不接受入院;14 天內有去過武漢及湖北省其他地區,不接受入院;有肺炎、流感病癥(如發燒、咳、鼻水),不接受入院

港怡醫院:曾經在內地醫院、診所就醫,不接受入院;14 天內有去過武漢及湖北省其他地區,不接受入院;有肺炎、流感病癥,不接受入院;曾接觸過確診患者,不接受入院

原來私家醫院咁偉大,一早就將所有有可能嘅病人晨早就摒諸門外,敢問林醫生有無質問過呢啲私家醫院嘅「初心」為何?有無本住唔「影響市民」嘅健康作為底線?有無對私家醫院嘅隔離政策口誅筆伐?

講番口罩,唔係淨係公立醫院缺口罩,私家醫生都係,醫學會向政府採購少部份口罩再抽籤賣俾私家醫生診所用,只有四百名私家醫生「幸運」地抽中,以 $170 一盒嘅成本價買到口罩,但係現時最少有十幾至二十間診所因為缺乏口罩被迫暫停運作。林醫生作為醫學會嘅副會長,有無質問屬下嘅醫生會員,點解會因為無口罩而停診?唔係兩日先換口罩都唔可以「落更」,以免辜負咗全港市民對醫護嘅期望?你哋班私家診所關門,啲市民傷風感冒搵邊個睇?唔通私家醫生就無任何道德責任?

自己作為私家醫生,自己唔駛承擔風險,率先要保護自己私家醫院同診所而關閉部份服務就可以,將所有香港、內地病人一口氣推哂俾公立醫院嘅醫護,再企喺道德高地,指責你哋班公院醫護,唔可以罷工,唔可以棄病人於不顧,無口罩都要硬食,私家醫生就尊貴無比,公院醫護嘅命就唔係命,呢啲就係林醫生作為私家醫生嘅「醫德」。

發表意見