立場新聞 Stand News

林鄭做咩唔研究自己幾時下台?

2020/1/14 — 21:16

1 月 14 日,特首林鄭月娥召開記者會公布紓困措施。

1 月 14 日,特首林鄭月娥召開記者會公布紓困措施。

一如所料,林鄭打民生牌以救民望,亦一如所料,連打民生牌都卑劣過人,更自我感覺良好,自詡為政府的最大德政。

咁都叫最大德政?知唔知乜叫高大空?

除了派幾粒糖,劃一長生津、擴大乘車優惠咁,就是東拼西湊,開啲內容空泛、方便走數兼無兌現日期的支票,當然更加無宏觀的路線圖和未來願景,進行結構性變革,改善貧富懸殊,長遠增加市民的快樂指數。但林鄭居然仲認叻,話自己做過社署署長和扶貧委員會主席,對呢方面工作好上心。喂,呢啲唔係馨香事嚟,只說明妳要為香港人感到無希望負上極大責任。妳唔係對窮人刻薄,只識聽商界意見,對弱勢社群無同情心,點會越扶越貧呢?

廣告

林鄭派租金津貼,實際上只是把錢暫時交到受惠者手上,轉頭又係去咗各大地主嗰度。治標唔治本,政府一旦財政轉差,就會 cut 津貼,到時又打回原形,仲可能因為呢段時間錯過做大手術的機會,令日後情況更惡劣。佢又話增加假期,但要分階段,要和商界商量喎,係咁就收得皮啦,聽商界意見,以佢地有錢賺到盡的習性,唔拖妳至奇,分到 2047 都未分完。咁妳會唔會先幫一些有心但手緊的中小企老闆改善員工的假期福利,改良社會氣氛,形成壓力迫大企業就範呢?唔見有囉!妳連具體少少的內容都講唔到,一係唔知點會確實執行到,一係無心做足,臨時拉伕講住先,充場面,湊夠十大措施,好聽啲啫。

不過,呢啲只反映妳涼薄還要充面子的個性,更荒謬嘅係,妳的十大紓困措施居然有一項:研究針對劏房推行租務管制。根據本研社兩年前做的調查,香港 100 間劏房只有 2 間合法。呢幾年的情況好明顯無改善,咁政府仲話要研究,係咪變相承認違法情況?難道大鑼大鼓做研究,到頭來只適用於嗰兩三間合法劏房?當然,更可笑的是,林鄭只係話會研究咋喎,點解研究都算係紓困措施呢?如果係,妳可以研究多十九幾樣嘢,吹到一百幾十樣紓困措施都得啦!

廣告

記住到時研究埋妳自己幾時落台,呢樣最紓民困。唔駛嬲,研究啫,無話實行,實唔實行,亦唔輪到妳的研究話事啦!

 

作者 Facebook

發表意見