立場新聞 Stand News

林鄭搵香港人做中國疫苗白老鼠咁大件事…

2020/12/11 — 18:57

圖片素材來源:作者製圖、立場新聞圖片

圖片素材來源:作者製圖、立場新聞圖片

冇人講咪我講囉!豪仔當然可以講!

林鄭宣佈,首批中国疫苗一百萬劑預計將會喺下個月到港,打哂落香港人身上。關於中国科興公司生產嘅疫苗,香港人有最少三件事要知。

1. 疫苗有效率未明,97% 有效係 Fake News

廣告

一般嚟講,任何藥物要經過三期臨床試驗,確保喺人體上有效、安全,先可以正式採用。現時英國採用嘅輝瑞藥廠疫苗,以至 AstraZeneca 疫苗,都已經完成及公開三期臨床試驗數據,確認有效及安全。

而於第一批到港嘅中国科興疫苗,係未有完成三期臨床試驗數據!現時有報導誤傳有效率達八成甚至 97%,都係 fake news。早喺三日前,科興自己都出嚟澄清,97% 只係血清內出現抗體嘅比率,唔代表臨床可以避免患上武肺嘅「有效率」。真正嘅有效率,臨床安全數據?尚未公佈,因為試驗仍然喺巴西等各國進行當中。

廣告

公司指第三期數據喺嚟緊一月就有機會可以公佈,林鄭就話一月會幫一百萬香港人打呢隻成效未明嘅中国疫苗。你聽完安唔安心,就自己判斷啦?

2. 科興公司曾賄賂官員,加快疫苗批核

2016 年,科興生物創始人兼首席執行官尹衛東喺法庭證詞中承認,由 2002 年到 2011 年,佢曾向負責疫苗審核的藥監官員尹紅章行賄 55 萬人民幣。藥監官員則承認,作為回報,佢加快批准科興嘅疫苗(SARS、禽流感、甲型流感疫苗等)。尹紅章後來因受賄罪被判 10 年監禁,而科興生物 CEO 則免予起訴。(這就是中国司法)

呢間公司嘅往績就係咁,今次呢隻疫苗未公佈臨床試驗數據,就可以喺香港大量使用,又唔知係咩原因呢?

3. 曾有接種者出現不明嚴重不良反應

如上述,疫苗現時係巴西進行試驗。曾經有報導指出,有參加試驗者出現「嚴重不良反應」,結果試驗一度被叫停最終嗰位志願者嘅官方死亡原因係列為自殺,然後巴西當局批准中国疫苗嘅試驗重新開始進行。

實際上嗰位志願者出現咩「不良反應」,又有幾多接種疫苗者有各種不良反應,我地無從得知,因為都係嗰句,佢地都未出試驗報告。


一句到尾,你信唔信中国疫苗,係你嘅事,我可以做嘅就係將以上事實話俾大家聽。

但無論大家點睇點諗,我地親愛嘅林鄭政府已經係冇考慮過香港人接唔接受、同唔同意嘅情況下訂咗一百萬劑中国疫苗,可能下個月就幫你家中兩老打啦,大家自求多福。

資料來源:
科興生物澄清新冠疫苗尚無有效率數據
科興疫苗 早年行賄黑料再被揭
新冠疫苗:巴西志願者之死引發的關注

作者製圖

作者製圖

【後記】香港老友記,你地真係第一批白老鼠啦! 

上回提要,林鄭購入嘅中國科興疫苗有三大問題:成效未明、科興有賄賂監管官員前科、有報導指該疫苗可導致嚴重不良反應。

但我翻閱文獻先發現我講漏咗最重要嘅一點

林鄭話會優先俾長者打疫苗,愈老愈優先,而第一批到港嘅就係中国疫苗。而我翻查中国疫苗已公佈嘅少量試驗數據,發現第一、二期嘅試驗中,中国疫苗係。從。未。喺。長。者。中。試。用。

先唔講其他疫苗有第三期試驗,AstraZeneca 同 Pfizer 疫苗嘅二期試驗都有包括長者。偏偏中国呢隻疫苗嘅現有安全數據中,係完全冇包括過任何一名老過 59 歲嘅人。我地知道武肺主要影響老人家,偏偏呢隻疫苗喺老人家身上是否安全有效,相關證據係徹底嘅零。

然後林鄭唔俾香港人選擇接種中国疫苗定 Pfizer/AstraZeneca,迫香港人買大細搏運氣。

這就是中国疫苗,這就是香港政府。

作者製圖

作者製圖

 

作者 Facebook (1) / (2)

發表意見